មន្ត្រីមន្ទីរកុងត្រូល ខេត្តប៉ៃលិន ចុះត្រួតពិនិត្យម្ហូបអាហារ និងទំនិញតាមទីផ្សារនានា ក្នុងក្រុងប៉ៃលិន រកឃើញនិងដកហូត ផលិតផល ហួសកាលបរិច្ឆេទ មួយចំនួនធំ

ខេត្តប៉ៃលិនៈ កាលពីព្រឹកថ្ងៃទី២១ ខែមិថុនា ឆ្នាំ២០១៨ ម្សិលមិញនេះ សាខាកាំកុងត្រូល ខេត្តប៉ៃលិន បានសហការជាមួយមន្ត្រីមន្ទីរពាណិជ្ជកម្មខេត្តប៉ៃលិន ចុះត្រួតពិនិត្យម្ហូបអាហារ និងទំនិញតាមទីផ្សារនានា ក្នុងក្រុងប៉ៃលិន រកឃើញ និងដកហូតផលិតផលហួសកាលបរិច្ឆេទមួយចំនួនធំ។

លោក គិត សុវណ្ណា អនុប្រធានសាខាកាំកុងត្រូលខេត្តប៉ៃលិន បានឲ្យដឹងថា ការចុះត្រួតពិនិត្យទំនិញនាពេលនេះគឺតាមការចង្អុលបង្ហាញពីលោក ឈិម វាសនា ប្រធានសាខាកាំកុងត្រូវ ខេត្តប៉ៃលិន ដើម្បីគិតគូរពីសុខភាពប្រជាពលរដ្ឋ ពិសេសត្រួតពិនិត្យ ចំណីអាហារ ដែលគ្មានស្លាកសញ្ញាត្រឹមត្រូវ ដែលធ្វើឲ្យប៉ះពាល់ដល់សុខភាពធ្ងន់ធ្ងរ ដូចជាឈឺពោះ រាគ ក្អួត ហើយបើព្យាបាលមិនទាន់ពេលទេ វាអាចធ្វើឲ្យយើងស្លាប់បាន ជាពិសេសកុមារតូចៗ។

ជាមួយគ្នាមន្ត្រីកាំកុងត្រូលបានបញ្ជាក់ថា ក្នុងឱកាសចុះត្រួតពិនិត្យទំនិញនាពេលនេះ យើងបានរឹបអូសទំនិញហួសកាលបរិច្ឆេទ និងខូចគុណភាព មួយចំនួនដូចជា៖ ទឹកដោះគោ ៣៣ប្រអប់ ស្ករគ្រាប់១៥កញ្ចប់ ទំពាំងបាយជូក្រៀម១៥កញ្ចប់ ដំណាប់៣កំប៉ុង នំស្រួយ១កញ្ចប់ មី០៧កំប៉ុង ភេសជ្ជៈ០៧កំប៉ុង សណ្តែកដី០៣កំប៉ុង និងទឹកខ្មេះរូបទន្សាយ០៧ដប។ ផលិតផលទាំងនេះនឹងត្រូវយកទៅកម្ទេចចោលទាំងអស់៕