ឯកឧត្ដម ឃឹម ប៊ុនសុង អភិបាលខេត្តសៀមរាប បញ្ជាអោយរុះរើផ្សារផល្លារាត្រីអង្គរ៥ នៅខេត្តសៀមរាប ខណៈពេលដែលអាជីវករ ៣០០ នាក់ និង ម្ចាស់ផ្សារកំពុងដេកកើតទុក្ខ...

សៀមរាប ៖ ឯកឧត្ដម ឃឹម ប៊ុនសុង អភិបាលខេត្តសៀមរាប បានបញ្ជាអោយម្ចាស់ផ្សារផល្លារាត្រីអង្គរ៥ ដែលមានអាជីវករកំពុងលក់ដូរវត្ថុអនុស្សាវរីយ៍ជូនភ្ញៀវទេសចរបរទេសចំនួនជិត ៣០០ នាក់ ស្ថិតនៅភូមិ ស្ទឹងថ្មី សង្កាត់ស្វាយដង្គំ ក្រុងសៀមរាប ខេត្ត សៀមរាប រុះរើតូប រើរបង និង ឈូសក្បាលដីគាត់ចំកណ្ដាលដីឡូត៍ដើម្បីបើកផ្លូវ ។ ការបញ្ជាអោយរើតូប រើរបង និងយកដីឡូត៍មានប័ណ្ណកម្មសិទ្ធិស្របច្បាប់ទៅឈូសបើកផ្លូវ បានធ្វើឡើងតាមរយះលិខិតមួយច្បាប់របស់ រដ្ឋបាលខេត្តសៀមរាប លេខ២៩៣ ស.ជ.ណ១៨ ចុះថ្ងៃទី ៧ ខែ មិនា ឆ្នាំ ២០១៨ ចុះហត្ថលេខាដោយ ឯកឧត្ដម ឃឹម ប៊ុនសុង ។ ក្នុងលិខិតបានព្រមានម្ចាស់ផ្សារដោយទុកពេលអោយតែ១៥ ថ្ងៃប៉ុណ្ណោះ បើមិនព្រមរុះរើអាជ្ញាធរខេត្តនឹងចុះមករុះរើដោយមីនទទួលខុសត្រូវការខូចខាតឡើយ ។

ហ៊ឺម គិតទៅនៅខេត្តសៀមរាបក្រោមការដឹកនាំរបស់ ឯកឧត្ដម ឃឹម ប៊ុនសុង ពលរដ្ឋពិតជាវេទនាណាស់ ដី មានប័ណ្ណកម្មសិទ្ធិត្រឹមត្រូវ គ្រាន់តែបើកផ្សារលក់ដូរដើម្បីរួមចំណែកទាក់ទាញភ្ញៀវទេសចរបរទេស ក៏រងការធ្វើទុក្ខបុកម្នេញអត់ឈប់ឈរពីអាជ្ញាធរដែរ ។ តើរុះរើផ្សារចោលអោយអាជីវករ៣០០ គ្រួសារទៅលក់ដូរនៅឯណា ? ហើយភាពស្របច្បាប់របស់ម្ចាស់ដីដែលមានប័ណ្ណកម្មសិទ្ធិបាត់ទៅណាអស់ហើយ ?

ជិតបោះឆ្នោតហើយ ឯកឧត្ដម ឃឹម ប៊ុនសុង គួរយកចិត្តរាស្ត្រខ្លះផងកុំបង្ករបញ្ហាក្ដៅក្រហាយអោយរាស្ត្រច្រើនពេក គួរគោរពរាស្ត្រជាអាជីវករ និង ម្ចាស់កម្មសិទ្ធិផង ។ យើងខ្ញុំសង្ឃឹមជឿជាក់ថា សម្ដេចតេជោ ហ៊ុន សែន និង ឯកឧត្ដមទេសរដ្ឋមន្ត្រី ជា សុផារ៉ា នឹងរកយុត្តិធម៌ជូនអាជីវករ និង ម្ចាស់ផ្សារស្របច្បាប់ពុំខាន ។