ស្នងការដ្ឋាននគរបាល ខេត្តបាត់ដំបង ចុះបង្ក្រាបទីតាំងបំរើសេវាល្បែងហ្គេមអ៊ីនធឺណេត១កន្លែង ដោយឃាត់ខ្លួនម្ចាស់អាជីវកម្មម្នាក់ និងក្មេងសិស្សសាលាចំនួន ២១នាក់

ខេត្តបាត់ដំបង៖ កម្លាំងក្រុមអន្តរាគមន៍បង្ការបង្ក្រាប នៃស្នងការដ្ឋាននគរបាល ខេត្តបាត់ដំបង បានបើកប្រតិបត្តិការចុះបង្ក្រាប ទីតាំងបំរើសេវាល្បែងហ្គេមអ៊ីនធឺណេត១កន្លែង កាលពីសៀល ថ្ងៃទី៧ ខែមិថុនា ឆ្នាំ២០១៨ នៅចំណុចក្រុមទី២៥ ភូមិ២០ឧសភា សង្កាត់ស្វាយប៉ោ ក្រុងបាត់ដំបង ដោយឃាត់ខ្លួនម្ចាស់អាជីវកម្មម្នាក់ និងក្មេងសិស្សសាលាចំនួន ២១នាក់។

បើតាមសម្ដីលោក ឧត្ដមសេនីយ៍ត្រី ជេត វណ្ណនី ស្នងការរងទទួលបន្ទុក បានអោយដឹងថាក្រោយទទួលបានព័ត៌មាន ពីប្រជាពលរដ្ឋ រាយការណ៏ពីករណីលួចលាក់បើកអាជីវកម្មហ្គេមអ៊ីនធឺណេត ដែលកំពុងពង្វក់ក្មេងសិស្សសាលា ភ្លាមនោះ ឯកឧត្ដម ឧត្តមសេនីយ៍ទោ អ៊ុច សុខុន ស្នងការនគរបាលខេត្តបាត់ដំបង បានដាក់បទបញ្ជារយ៉ាងម៉ឺងម៉ាត់ ក្នុងការយកចិត្តទុកដាក់ទប់ស្កាត់បង្ក្រាបអោយបានដើម្បីធានាការពង្រឹងលើផ្នែកសន្តិសុខ សណ្តាប់ធ្នាប់សង្គម ពិសេសលើមុខសញ្ញាល្បែងស៊ីសងខុសច្បាប់គ្រប់ប្រភេទតែម្តង។

លោកបន្តថា ទីតាំងល្បែងហ្គេមអ៊ីនធឺណេតខាងលើ មានយីហោ(SE7EN2) ដែលមានម្ចាស់គ្រប់គ្រងអាជីវកម្មឈ្មោះ លី ប៊ុនឡុង ភេទប្រុស អាយុ២៦ឆ្នាំ មានទីលំនៅក្នុងភូមិសង្កាត់ខាងលើ ត្រូវបានឃាត់ខ្លួន រួមនិងក្មេងសិស្សសាលាតូចៗសរុបចំនួន ២១នាក់ផងដែរ ក្នុងនោះសមត្ថកិច្ចជំនាញដកហូតវត្ថុតាងបាន រួមមាន៖ ម៉ាស៊ីនកុំព្យូទ័រចំនួន២០គ្រឿង ម៉ូនីទ័រចំនួន២០គ្រឿង ម៉ូតូចំនួន១០គ្រឿង និងសម្ភារះប្រើប្រាស់ពាក់ព័ន្ធជាច្រើនមុខទៀត។

ក្រោយធ្វើការបង្ក្រាបអ្នកពាក់ព័ន្ធជាម្ចាស់បើកអាជីវកម្ម ក្មេងសិស្សសាលា និងសម្ភារៈវត្ថុតាង ត្រូវបានកម្លាំងជំនាញនាំបញ្ជូនទៅកាន់ស្នងការដ្ឋាននគរបាលខេត្ត ដើម្បីអនុវត្តបន្តទៅតាមនីតិវិធី៕