កោះកុងៈ ជនសង្ស័យម្នាក់នេះ ត្រូវបានប៉ូលីសស្រុកបូទុមសាគរ ឃាត់ខ្លួនកាលពីថ្ងៃទី០៣ ខែកក្កដាឆ្នាំ២០១៨ នៅឃុំអណ្តូងទឹក បញ្ជូនមកកាន់ស្នងការដ្ឋានប៉ូលីស ខេត្តកោះកុង ដើម្បីបន្តចាត់ការតាមនិតិវិធី ក្រោយជនសង្ស័យរូបនេះ លួចម៉ូតូគេមួយគ្រឿងជិះពីក្រុងខេមរភូមិន្ទ សំដៅទៅ រាជធានីភ្នំពេញ តាមផ្លូវជាតិលេខ៤៨ ដែលតភ្ជាប់ពីផ្លូវជាតិលេខ៤ មកកាន់ខេត្តកោះកុង។ ជនសង្ស័យឈ្មោះ យន់ បូណា ភេទប្រុស អាយុ៣២ឆ្នាំ មុខរបរមិនពិតប្រាកដ ទីលំនៅភូមិព្រៃព្នៅ ឃុំព្រៃព្នៅ ស្រុកពារាំង ខេត្តព្រៃវែង។

បើតាមលោក ឡាយ ម៉េងឡាំង ប្រធានការិយាល័យព្រហ្មទណ្ឌកំរិតស្រាលនៃស្នងការដ្ឋាន ខេត្តកោះកុង បានឲ្យដឹងថា ជនសង្ស័យខាងលើ បានចាញ់ការចាក់បាល់អស់លុយពីខ្លួន រួចក៏ដាច់ចិត្តលួចម៉ូតូគេម៉ាក Scoopy គ្មានស្លាកលេខមួយគ្រឿង កាលពីវេលាម៉ោងប្រមាណជាង៨ព្រឹកថ្ងៃទី៣ ខែកក្កដា បម្រុងជិះគេចខ្លួនទៅភ្នំពេញតែគេចមិនរួច នៅវេលាម៉ោងប្រហែល១១ៈ៣០នាទី ថ្ងៃដដែលក៏ត្រូវបាន ប៉ូលលីសក្រុងខេមរភូមិន្ទសហការជាមួយ ការិយាល័យព្រហ្មទណ្ធកំរិតស្រាលនិងកម្លាំងអធិការដ្ឋាន ស្រុកបូទុមសាគរ ធ្វើការចាប់ខ្លួនតាមពាក្យបណ្តឹងជនរងគ្រោះរួមនិងវត្ថុតាង បញ្ជូនទៅផ្តន្ទាទោសតាមច្បាប់ ចំណែកម៉ូតូ សមត្ថកិច្ចក៍បានប្រគល់ជូនម្ចាស់ដើមវិញក្រោយបញ្ចប់និតិវិធីវិញផងដែរ៕ ប្រភពៈ កូន ខ្លាតូច