មនុស្សចាស់សក់ ស ជូនដំណើរ មនុស្សសក់ ខ្មៅ មានអ្នកណាយល់អារម្មណ៍មួយនេះទេ ថាវាឈឺចាប់ប៉ុណ្ណា...ឪពុកម្តាយជនរងគ្រោះ ស្រែករកយុត្តិធម៏ ខណៈពេលដែលតុលាការ ចេះតែលើកសវនាការ ម្តងជាពីរដង ពីរដងជាបីដង ហើយជនល្មើសនៅតែមិនទាន់ចាប់បានមកផ្តន្ទាទោសទៀត......

កណ្ដាល៖ ឪពុកម្តាយជនរងគ្រោះ ស្រែករកយុត្តិធម៏ និងចង់ឲ្យតុលាការជួយពន្លឿននីតិវិធីច្បាប់ ក្នុងករណី ជនរងគ្រោះត្រូវបានជនល្មើសចំនួន៥នាក់ កាប់ជនរងគ្រោះយ៉ាងព្រៃផ្សៃគ្មានមេត្តាអ្វីបន្តិច ដែលហេតុការណ៍បានឡើងតាំងពីថ្ងៃទី២៤ ខែកញ្ញា ឆ្នាំ២០១៧មកម្ល៉េះ។

នៅថ្ងៃទី១៩ ខែមិថុនា ឆ្នាំ២០១៨នេះ សាលាដំបូងខេត្តកណ្ដាល សម្រេចលើកពេលសវនាការជាលើកទី៣ ដែលជាហេតុធ្វើឲ្យឪពុកម្តាយ ជាដើមបណ្តឹង សម្តែងការមិនពេញចិត្តជាខ្លាំង ។

ជនរងគ្រោះក្នុងសំណុំរឿងនេះឈ្មោះ មឿន រ៉ូហ្សា ភេទប្រុស អាយុ២២ឆ្នាំ ។

ចំណែកជនល្មើសមានចំនួន៥នាក់ ទី១. ឈ្មោះ ផេង ណារ័ត្ន ភេទប្រុស អាយុ១៦ឆ្នាំ (ក្រៅឃុំ) ទី២.ឈ្មោះយ៊ិន វាសនា ហៅ កែម វាសនា ភេទប្រុស អាយុ១៩ឆ្នាំ (គេចខ្លួន) ទី៣.ឈ្មោះថាំង ម៉េងហួយ ហៅម៉ៅ ភេទប្រុស អាយុ១៧ឆ្នាំ (ក្រៅឃុំ) ទី៤.ឈ្មោះឈុន រតនៈ ហៅ មឿន ណាក់ ភេទប្រុស អាយុ១៨ឆ្នាំ (ក្រៅឃុំ) ទី៥.ឈ្មោះចន ភស្ត្រា ភេទប្រុស អាយុ២០ឆ្នាំ (គេចខ្លួន)។

ជនជាប់ចោទទាំង៥នាក់ ត្រូវបានចោទប្រកាន់ពីបទ"ហិង្សាដោយចេតនាមានស្ថានទម្ងន់ទោសដោយសារមរណភាពនៃជនរងគ្រោះ"ប្រព្រឹត្តនៅភូមិក្រងស្វាយ ឃុំស្វាយអំពារ ស្រុកមុខកំពូល ខេត្តកណ្ដាល កាលពីថ្ងៃទី២១ ខែកញ្ញា ឆ្នាំ២០១៧ តាមមាត្រា២២៤នៃក្រមព្រហ្មទណ្ឌ ។

ឪពុកម្តាយ ជនរងគ្រោះបានប្រាប់ថា កូនប្រុសត្រូវបានក្រុមជនល្មើសកាប់សម្លាប់យ៉ាងព្រៃផ្សៃ តែរហូតមកទល់ពេលនេះ គ្មានជនល្មើសណាមួយត្រូវបានចាប់ខ្លួនដើម្បីផ្តន្ទាទោសតាមច្បាប់ទេ ។ ទឹកចិត្តជាម្តាយនៅពេលឃើញកូនស្លាប់ទាំងវេទនា បែបនេះគ្មានអ្នកណាម្នាក់អាចនៅស្ងៀមបាននោះទេ ផ្ទុយទៅវិញសាលាដំបូងខេត្តកណ្ដាល ហាក់យឺតយ៉ាវជាទីបំផុត ដែលសវនាការបានលើកពេល៣ដងមកហើយ ។