កញ្ញា មាស សុខសោភា ជាតារាចម្រៀងមួយរូបដែលទទួលបានការគាំទ្រយ៉ាងច្រើនពីសំណាក់ ពុកម៉ែ បងប្អូន ហើយលើកនេះផងដែរ តារាចម្រៀងសំនៀងផ្អែម កញ្ញា មាស សុខសោភា​ បានធ្វើឲ្យទស្សនិកជនស្រក់ទឹកភ្នែក ជាមួយនឹងបទចម្រៀងថ្មី​ របស់កញ្ញាដែលមានចំណងជើងថា "វីរបុរសក្នុងចិត្ត"។

តារាស្រីលំដាប់ជួរមុខ កញ្ញា មាស សុខសោភា បានប្រាប់ថា "នៅក្នុងប៉ារូលបទចម្រៀងមួយនេះ បានធ្វើឲ្យកញ្ញាមានការពេញចិត្តជាខ្លាំង ដោយការពីមុនកញ្ញា​ ធ្លាប់តែបកស្រាយបទចម្រៀងដែលទាក់ទងនឹងម្តាយ តែលើកនេះហាក់មានអារម្មណ៍ប្លែក ព្រមទាំងរំភើបផងដែរ។ កញ្ញា ក៏បានរៀបរាប់បន្តទៀតថា ដោយសារតែជាកូនស្រីម្នាក់ ដែលបាត់បង់លោកមានគុណជិត២០ឆ្នាំមកហើយ។ កញ្ញាបានរៀបរាប់ទាំងក្តុកក្តួលចិត្តទៀតថា ប៉ារូលបទចម្រៀងមួយបទនេះ កញ្ញាពិតជាចង់បទស្រាយពិតមែន ព្រោះមានរឿងខ្លះវាត្រូវនឹងសាច់រឿងខ្លួនឯង​ផងដែរ"។ អ្វីដែលធ្វើឲ្យកញ្ញា​អួលដើមកនោះ គឺកញ្ញាមានអារម្មណ៍ថា នឹករលឹកដល់លោកមានគុណយ៉ាងខ្លាំង ព្រោះតែអត្តន័យបទចម្រៀងមួយបទនេះ ហាក់ចាក់ដោតចិត្តកញ្ញាខ្លាំងមែនទែន។ ជាក្មេងស្រីម្នាក់ដែលកំព្រាឪពុកតាំងពីក្មេង ដែលតែងតែចង់បាននូវភាពកក់ក្តៅពីលោកឪពុក តែពេលវេលាបានកន្លងហួសទៅហើយ ទោះចង់ទៅរកគាត់ក៏មិនអាចទៅរួចដែរ។ កញ្ញាបានរៀបរាប់ទាំងអួលដើមកទៀតថា នៅពេលកញ្ញាបានស្តាប់បទចម្រៀងនេះដំបូង គឺទឹកភ្នែកកញ្ញាស្រក់មិនដឹងខ្លួន ហើយកញ្ញាមានការនឹកនាលោកមានគុណយ៉ាងខ្លាំង។ បទចម្រៀងមួយនេះ បានបង្កប់នូវអត្ថន័យយ៉ាងជ្រាលជ្រៅ និងធំធេងសម្រាប់នាង ក៏ដូចជាទស្សនិកជនទូទៅ។ នាងក៏ជូនពរដល់លោកឪពុកទាំងអស់ នៅលើពិភពលោក ដែលបានចំណាយពេលបំពេញតួនាទីជាឪពុកដ៏ល្អ មានសុខភាពល្អ និងក្លាយជាម្លប់ដល់កូនៗដល់ចាស់កោងខ្នង៕ មានវីដេអូ៖ ប្រភពៈ Official Town Production ដោយ៖ និមល