ជាការពិតណាស់បើនិយាយពីកីឡាប្រដាល់គុនខ្មែរ លន បញ្ញា ជឿជាក់ថាប្រិយមិត្តដែលនិយមគាំទ្រវិស័យគុនខ្មែរ ពិតជាបានស្គាល់ច្បាស់ជាក់ជាមិនខាន ព្រោះថា លន បញ្ញា គឺជាកីឡាករមួយរូបដែលមានស្នៀតប្រយុទ្ធពិសេសៗជាច្រើនដើម្បីផ្តួលដៃគូរបស់ខ្លួននៅលើសង្វៀន ។
យ៉ាងណាមិញបើយើងក្រឡេកមកមើលពីជីវិតរបស់កីឡាកររូបនេះវិញគឺថា លន បញ្ញា ជាកូនអ្នកខេត្តព្រៃវែង ហើយសព្វថ្ងៃនេះរូបគេកំពុងតែទទួលបានជោគជ័យខ្លាំងនៅក្នុងអាជីពជាអ្នកប្រដាល់របស់ខ្លួន ព្រោះថាបច្ចុប្បន្ននេះ បញ្ញា មានលុយ មានឡាន មានផ្ទះ និងមានភាពល្បីល្បាញខ្លាំងទៀតផង ទាំងនេះគឺសុទ្ធតែជាសមិទ្ធផលដែលកើតចេញពីវិស័យប្រដាល់ បូករួមទាំងការខិតខំប្រឹងប្រែងរបស់គេបន្ថែមទៀតនោះទើបរូបគេទទួលបានជោគជ័យដូចសព្វថ្ងៃនេះ ។
ជាមួយគ្នានេះដែរបច្ចុប្បន្នគេឃើញថា កីឡាករ លន បញ្ញា កំពុងតែសាងសង់ផ្ទះរបស់ខ្លួនដែលជាវិឡាទោ ចំណែកតម្លៃវិញប្រហែលជាង ៤មុឺនដុល្លារអាមេរិក មិនបូកតម្លៃដី និងការទិញសម្ភារផ្សេងៗចូលក្នុងផ្ទះនោះទេ។ ហើយប្រាក់ទាំងនេះគឺបញ្ញា បានសន្សំបន្ទាប់ពីឡើងដាល់រួច ។
កូនសិស្សលោក ធន់ សុភា រូបនេះបន្ថែមទៀតថា ផ្ទះរបស់ខ្លួននេះចាប់សាងសង់អំឡុងពាក់កណ្ដាលខែមីនា និងត្រូវបញ្ចប់ទាំងស្រុងអំឡុងខែកក្កដាខាងមុខ។ លន បញ្ញា បញ្ជាក់ទៀតថា ថវិកាទាំងអស់នេះគឺរូបគេសន្សំពីប្រដាល់ប្រហែលបីបួនឆ្នាំរួមជាមួយប្រាក់ខែជាទាហានរបស់ខ្លួន៕
