បទ «Time To Rise » ទទួលបានការគាំទ្រយ៉ាងខ្លាំង ពីសំណាក់មហាជនទូទាំងប្រទេស ដោយមានអ្នកចូលទស្សនា យ់ាងច្រើនកុះករ រហូតមានអ្នកចូលទស្សនា ដល់ទៅ១០០លានដងឯណោះ ដែលជាហេតុធ្វើឲ្យបងប្អូនខ្មែរយើង ពិតជាត្រេកអរខ្លាំងណាស់ ក្រោយពេលបានទស្សនាវិដេអូដ៏អស្ចារ្យមួយនេះមានការចូលរួមជាមួយព្រឹទ្ធាចារ្យលោកតា គង់ ណៃ នៅក្នុងផលិត MV មួយបទនេះ។
ស្របពេលកំពុងតែមានការលើកឡើងជាហូរហែនៃសមិទ្ធផលដ៏ល្អមួយនេះ ទើបបណ្តាលឲ្យតារាចម្រៀងប្រុស លោក វណ្ណដា បានបង្ហាញអារម្មណ៍ ក៏អរគុណដល់បងប្អូនមហាជន ស្រឡាញ់គាំទ្រចំពោះបទចម្រៀងនេះ។ ក្រោយពេលបានឃើញ បងប្អូនមហាជន ចូលទស្សនាវិដេអូ មានចំនួនច្រើនបែបនេះ ក៏សប្បាយចិត្ត រំភើបព្រោះឃើញសមិទ្ធផលដ៏ល្អ។
លោកឧកញ៉ា ស្រី ចាន់ថន បានបង្ហាញអារម្មណ៍ថា "Time To Rise អាចនិយាយបានថាជាបទចម្រៀងមួយដែលប្រៀបបានដូចកញ្ចក់ឆ្លុះបញ្ចាំងពីការអភិរក្សនិងអភិវឌ្ឍលើកតម្កើងមរតកជាតិ អាចធ្វើឱ្យប្រជាជនក្នុងនិងក្រៅប្រទេសជាច្រើនលើសកលលោកបានស្គាល់ពីសិល្បៈខ្មែរ ដោយទទួលបានការគោរព សាទរ ស្រឡាញ់ និង ទទួលស្គាល់វិស័យសិល្បៈនៅកម្ពុជា។
ក្នុងនាមខ្ញុំផ្ទាល់ជាជនជាតិខ្មែរ សូមចូលរួមអបអរសាទរ និងកោតសរសើរ ក៏ដូចជាមានមោទនភាពបំផុត ចំពោះស្នាដៃផលិតរបស់ប្អូនប្រុស វណ្ណដា-Vanda ដែលបានបង្កើតស្នាដៃផលិតនូវបទចម្រៀង Time To Rise ដោយមានការចូលរួមវត្តមានដ៏ខ្ពង់ខ្ពស់របស់ព្រឹទ្ធាចារ្យ គង់ ណៃ ទៀតផងដោយមាន ១០០លានការចូលទស្សនា។
ក្នុងនោះខ្ញុំសង្ឃឹមថាពុកម៉ែបងប្អូនទាំងអស់ និងបន្តលើកទឹកចិត្ត ក៏ដូចជាគាំទ្រដល់ប្អូនៗដើម្បីបង្កើតនៅស្នាដៃថ្មីៗបន្តទៀត ដើម្បីបង្ហាញអោយដឹងថា ខ្មែរអាចធ្វើបាន …។
