ភ្នំពេញៈ កាលពីវេលាម៉ោង១ៈ៤០នាទីយប់រំលងអធ្រាត្រ ឈានចូលថ្ងៃទី២៧ ខែកក្កដា ឆ្នាំ២០១៨ នៅចំណុចផ្លូវលំ ភូមិត្នោតជ្រុំ៤ សង្កាត់បឹងទំពុន២ ខណ្ឌមានជ័យ រាជធានីភ្នំពេញ។ ជនសង្ស័យម្នាក់មានឈ្មោះ ជូ លីន ភេទប្រុស អាយុ៣៩ឆ្នាំ មុខរបរ រើសអេតចាយ ស្នាក់នៅភូមិខ្វា សង្កាត់ដង្កោ ខណ្ឌដង្កោ រាជធានីភ្នំពេញ មានផ្ទុកសារធាតុញៀនក្នុងទឹកនោម និងម្នាក់ទៀតឈ្មោះ វ៉េង មាស សំណាង ត្រូវបានកម្លាំងនគរបាលប៉ុស្តិ៍បឹងទំពុន២ ខណ្ឌមានជ័យ ធ្វើការស្រាវជ្រាវចាប់ឃាត់ខ្លួនបាន ពាក់ពន្ធ័នឹងករណី ប៉ុនប៉ងលួចទ្រព្យសម្បត្តិ និងរត់គេចពីការឃុំខ្លួន ។

សមត្ថកិច្ចបានឲ្យដឹងថា កាលពីវេលាម៉ោង២ៈ៤៥នាទី យប់ឈានចូលថ្ងៃទី២២ ខែមេសា ឆ្នាំ២០១៨ នៅចំណុចផ្លូវ៦៩ BT ភូមិត្នោតជ្រុំ២ សង្កាត់បឹងទំពុន២ ខណ្ឌមានជ័យ កម្លាំងនគរបាលប៉ុស្តិ៍បឹងទំពុន២ បានឃាត់ខ្លួនជនសង្ស័យ២នាក់ ឈ្មោះ ជូ លីន និងឈ្មោះ វ៉េង មាស សំណាង ពីបទ ប៉ុនប៉ងលួច យកទ្រព្យសម្បត្តិ ហើយក៏ឃាត់ខ្លួនទាំង២នាក់យកមកសាកសួរនៅប៉ុស្តិ៍។ លុះដល់ថ្ងៃទី២៤ ខែមេសា ឆ្នាំ២០១៨ វេលាម៉ោង៤ ជនសង្ស័យទាំង២នាក់បានឆ្កឹះសោទ្វាបន្ទប់ឃាត់ខ្លួនទាំង២នាក់ តែសមត្ថកិច្ចបានដេញចាប់បានឈ្មោះ វ៉េវ មាសសំណាង បញ្ជូនទៅកាន់សាលាដំបូងរាជធានីភ្នំពេញ។ ចំណែកឈ្មោះ ជូ លីន បានរត់គេចខ្លួន។ លុះដល់វេលាម៉ោង១ៈ៤០នាទីយប់ ថ្ងៃទី២៧ ខែកក្កដា ឆ្នាំ២០១៨ នគរបាលប៉ុស្តិ៍បឹងទំពុន២ បានឃាត់ខ្លួនជនសង្ស័យឈ្មោះ ជូ លីន បានតែម្តងយកមកធ្វើការសាកសួរ និងកសាងសំណុំរឿងចាត់ការតាមផ្លូវច្បាប់បន្តទៀត៕