រដ្ឋមន្ត្រីក្រសួងការពារជាតិ លោក ភូមិថាំ វីឆាយ៉ាឆៃ (Phumtham Wechayachai) បានចេញសេចក្តីថ្លែងការណ៍ទាំងព្រឹកព្រលឹមថ្ងៃសៅរ៍សប្តាហ៍នេះទាក់ទងនឹងភាពតានតឹងនៅព្រំដែនកម្ពុជា-ថៃ ដោយអះអាងថាកម្ពុជាបានច្រានចោលកិច្ចខិតខំប្រឹងប្រែងដើម្បីបន្ធូរបន្ថយស្ថានការណ៍ បន្ទាប់ពីកម្ពុជាបានបង្ហាញជំហរថាខ្លួនមិនដកចេញពីទីតាំងដែលជាដែនអធិបតេយ្យភាពរបស់កម្ពុជា បានឡើយ។
នៅក្នុងខ្លឹមសារនៃសេចក្តីថ្លែងការណ៍ រដ្ឋមន្ត្រីក្រសួងការពារជាតិថៃអះអាងថា បន្ទាប់ពីកិច្ចពិភាក្សារវាងលោក និងរដ្ឋមន្ត្រីក្រសួងការពារជាតិកម្ពុជា សំណើដែលមានគោលបំណងកាត់បន្ថយការប្រឈមមុខដាក់គ្នា និងការជំរុញសន្តិភាពត្រូវបានច្រានចោល ហើយថាកម្ពុជាជាអ្នកបង្កើនស្ថានការណ៍ឱ្យតានតឹងក្នុងតំបន់។ ជាការពង្រឹងវិធានការលោក ភូមិថាំ បានបញ្ជាក់ពីគោលជំហររបស់រដ្ឋាភិបាលថៃចំនួន៤ចំណុច។
ប្រទេសថៃនឹងមិនអនុញ្ញាតឱ្យមានការរំលោភលើអធិបតេយ្យភាពរបស់ខ្លួនក្នុងកាលៈទេសៈណាក៏ដោយ ហើយត្រៀមខ្លួនយ៉ាងពេញលេញដើម្បីការពារអធិបតេយ្យភាពជាតិឱ្យអស់ពីសមត្ថភាព។ ក្រសួងការពារជាតិថៃបញ្ជាក់ជាថ្មីនូវការគាំទ្ររបស់ចំពោះយោធាក្នុងការបំពេញភារកិច្ចរបស់ខ្លួនឱ្យអស់ពីសមត្ថភាព និងបង្ហាញពីការលើកទឹកចិត្តចំពោះបុគ្គលិកទាំងអស់ដែលកំពុងធ្វើការដើម្បីការពារទឹកដីរបស់ប្រទេសថៃ។ រាល់សកម្មភាពដែលធ្វើឡើងដោយប្រទេសថៃ នឹងផ្តល់អាទិភាពដល់សុវត្ថិភាព សន្តិភាព និងសន្តិសុខរបស់ប្រជាជនដែលរស់នៅតាមតំបន់ព្រំដែន ក៏ដូចជាសុខុមាលភាពរបស់បុគ្គលិកយោធាដែលខិតខំប្រឹងប្រែងរបស់យើង។
ប្រទេសថៃមិនទទួលយកយុត្តាធិការរបស់តុលាការយុត្តិធម៌អន្តរជាតិ (ICJ) ចាប់តាំងពីឆ្នាំ១៩៦០ ហើយនៅតែបន្តគាំទ្រការប្រើប្រាស់ការចរចាទ្វេភាគីក្រោម MOU ឆ្នាំ ២០០០ ដែលបានព្រមព្រៀងដោយភាគីទាំងពីរ។ រដ្ឋាភិបាលថៃបានបញ្ជាក់ម្តងទៀតថា គណៈកម្មការព្រំដែនរួម (JBC) គួរតែជាវេទិកាសម្រាប់ការស្វែងរកដំណោះស្រាយដោយសន្តិវិធីឱ្យបានឆាប់តាមដែលអាចធ្វើទៅបាន។
ប្រទេសថៃរក្សាជំហរដើម(វត្តមាន)របស់ខ្លួន និងស្នើឱ្យភាគីទាំងពីរកែសម្រួលកងកម្លាំងយោធារបស់ពួកគេត្រឡប់ទៅទីតាំងដើមដូចដែលបានអនុវត្តក្នុងឆ្នាំ ២០២៤ ដើម្បីកាត់បន្ថយលក្ខខណ្ឌដែលបង្កើនភាពតានតឹង និងការប្រឈមមុខដាក់គ្នា។ លោកបញ្ជាក់ថា នឹងមិនយល់ស្របនឹងសកម្មភាពណាមួយដែលរំលោភលើអធិបតេយ្យភាពរបស់ប្រទេសថៃនោះទេ។ រដ្ឋាភិបាល និងយោធាបានត្រៀមខ្លួនយ៉ាងពេញលេញក្នុងការការពារ និងថែរក្សាអធិបតេយ្យភាពដោយគ្រប់ការចំណាយទាំងអស់។
ការចេញផ្សាយសេចក្តីថ្លែងការណ៍របស់រដ្ឋមន្រ្តីក្រសួងការពារជាតិថៃខាងលើ បន្ទាប់ពីថៃបានដាក់សំណើរសុំឱ្យកម្ពុជាដកកងទ័ពចេញពីទីតាំងឈរជើងនៅតំបន់មុំបី តែសំណើត្រូវបដិសេធព្រោះទីតាំងខាងលើជាទីតាំងស្ថិតក្នុងដែនអធិបតេយ្យភាពរបស់កម្ពុជាដែលបានឈរជើងជាអចិន្ត្រៃយ៍តាំងពីដើម។ ដូច្នេះកម្ពុជាមិនអាចថយពីទីតាំងដែលកងទ័ពកម្ពុជាបានឈរជើងជាយូរណាស់មកហើយ និងដែលស្ថិតក្នុងដែនអធិបតេយ្យភាពរបស់កម្ពុជាបានឡើយ។ នេះបើតាមសេចក្តីថ្លែងការណ៍របស់ក្រសួងការពារជាតិកម្ពុជានាថ្ងៃទី៦ ខែមិថុនា ឆ្នាំ២០២៥។
រដ្ឋមន្រ្តីក្រសួងការពារជាតិកម្ពុជាលោក ទៀ សីហា បានបញ្ជាក់ថា នៅក្នុងជំនួបជាមួយរដ្ឋមន្រ្តីក្រសួងការពារជាតិថៃ ភាគីកម្ពុជា-ថៃ ក៏បានឯកភាពគ្នាកាត់បន្ថយភាពតានតឹង ដោយភាគីទាំងពីរបានរក្សាការប្រាស្រ័យទាក់ទងគ្នាទៅវិញទៅមក ការយោគយល់គ្នា និងរក្សាការសន្ទនាដោយសន្តិវិធីទៅថ្ងៃខាងមុខទៀតក្នុងគោលបំណងចៀសវាងការប៉ះទង្គិចគ្នាដោយយោធា។ កម្ពុជាមានបំណងទទួលយកសន្តិភាព ស្ថិរភាព និងតម្កល់ប្រយោជន៍ប្រជាជនទាំងសងខាងជាធំ។
កម្ពុជាក៏បានប្រាប់ទៅកាន់ភាគីថៃថា កម្ពុជាសម្រេចចិត្តរៀបចំសំណុំរឿងបញ្ជូនវិវាទតំបន់ទាំង៤ តំបន់មុំបី ប្រាសាទតាមាន់ធំ ប្រាសាទតាមាន់តូច និងប្រាសាទតាក្របី ទៅតុលាការយុត្តិធម៌អន្តរជាតិ(ICJ) នៅទីក្រុងឡាអេ ដើម្បីបញ្ចប់ជម្លោះនិងកំណត់ព្រំដែនជាក់លាក់។ ក្នុងនោះភាគីថៃ ក៏បានបង្ហាញពីការគោរពសិទ្ធិកម្ពុជាក្នុងការដាក់ចំនុចទាំង ៤ទៅតុលាការយុត្តិធម៌អន្តរជាតិ(ICJ) ហើយក៏បានឯកភាពគ្នាក្នុងការបន្តយន្តការចរចាក្នុងកិច្ចប្រជុំ GBC/JBC/RBC ទៅលើចំណុចដទៃៗទៀតនាថ្ងៃខាងមុខ៕
