​កណ្តាលៈ រថយន្តម៉ាកបាឡែន១គ្រឿង ឆ្លងចរន្តភ្លើង បណ្ដាលឲ្យឆេះរថយន្ត ខូចខាតសម្ភារៈគ្មានសល់កាលពីវេលាម៉ោង៤ៈ៣០នាទីរសៀល ថ្ងៃទី២៦ ខែកក្កដា ឆ្នាំ២០១៨ ស្ថិតនៅចំណុចទល់មុខការ៉ាសសាំងតេលា លើផ្លូវជាតិលេខ១ គីឡូម៉ែត្រលេខ ៥៤-៥៥ ភូមិក្បាលជ្រោយ ឃុំកំពង់ភ្នំ ស្រុកលើកដែក ខេត្តកណ្តាល។

ម្ចាស់រថយន្តឈ្មោះ ងិន សុបិន ភេទប្រុស អាយុ២៩ឆ្នាំ មុខរបរជាងសំណង់ មានទីលំនៅភូមិត្រពាំងស្បូវ ឃុំព្រៃតាអី ស្រុកស្វាយទាប ខេត្តស្វាយរៀង។ បើកបររថយន្តម៉ាកបាឡែន ស៊េរី២០០២ ពណ៌ទឹកប្រាក់ ពាក់ស្លាកលេខស្វាយរៀង 2A 2382 ។ ករណីឆេះរថយន្តនេះ ត្រូវបានប្រជាពលរដ្ឋ និងកម្លាំងជំនាញនិងកម្លាំងប៉ុស្តិ៍រដ្ឋបាល ពន្លត់រលត់ទាំងស្រុង។