ជនសង្ស័យម្នាក់ ដែលបានធ្វើសកម្មភាព យកដំបងវាយទៅលើយុវជនម្នាក់ សន្លប់រួចប្លន់យកទ្រព្យសម្បត្តិ៍នោះ ត្រូវសមត្ថកិច្ចចាប់ខ្លួនហើយ

បាត់ដំបងៈ កាលពីម៉ោង៨យប់ថ្ងៃទី២៣ ខែកក្កដា ឆ្នាំ២០១៨ នៅចំណុចទួលតាថៃ ខាងលិចបឹងស្នោ ក្នុងភូមិសំរោងតាកុក ឃុំសំរោងក្នុង ស្រុកឯកភ្នំ ខេត្តបាត់ដំបង។ យុវជនម្នាក់ ត្រូវបានជនមិនស្គាល់មុខម្នាក់ បានយកដំបងវាយបណ្ដាលឲ្យសន្លប់ រួចជនសង្ស័យលើកយកម៉ូតូ និងទ្រព្យសម្បត្តិមួយចំនួនទៀត ជិះគេចខ្លួមបាត់ដោយសុវត្ថិភាព។

រហូតមកដល់ថ្ងៃពុធ ទី២៥ ខែកក្កដា ឆ្នាំ២០១៨ វេលាម៉ោង១២ៈ៥០នាទីថ្ងៃត្រង់ នៅចំណុចភូមិបាសែត ឃុំតាប៉ុន ស្រុកសង្កែ ខេត្តបាត់ដំបង។ សមត្ថកិច្ចធ្វើការឃាត់ខ្លួន ជនសង្ស័យម្នាក់ឈ្មោះ ស៊ីន ពិសិដ្ឋ ភេទប្រុស អាយុ៣០ឆ្នាំ មានទីលំនៅ ភូមិបាសែត ឃុំតាប៉ុន ស្រុកសង្កែ ខេត្តបាត់ដំបង បានធ្វើសកម្មភាពយកដំបងឈើវាយ ទៅលើយុវជនម្នាក់ឈ្មោះ ថៃ ធៀង ភេទប្រុស អាយុ២៣ឆ្នាំ មានទីលំនៅ ភូមិសម្តេចឃុំតាប៉ុន ស្រុកសង្កែ ខេត្តបាត់ដំបង។ បណ្ដាលឲ្យសន្លប់រួចប្លន់យកម៉ូតូ និងសម្ភារៈមួយចំនួន កាលពីថ្ងៃទី២៣ ខែកក្កដា។

ក្រោយឃាត់ខ្លួនសមត្ថកិច្ចដកហូតវត្ថុតាងរួមមានៈ ម៉ូតូមួយគ្រឿងម៉ាកហុងដាឌ្រីម C125 ពណ៌ខ្មៅ ស៊េរីឆ្នាំ២០១៤ ពាក់ស្លាកលេខ បាត់ដំបង 1S-0318 កុំព្យូទ័រលេបថប ពណ៌ខ្មៅ មួយគ្រឿង ទូរស័ព្ទដៃម៉ាក Iphone មួយគ្រឿង ទូរស័ព្ទដៃម៉ាក camfone មួយគ្រឿង និងពូថៅមួយ។ បច្ចុប្បន្នសមត្ថកិច្ច បានប្រគល់ជនសង្ស័យ និងវត្ថុតាងទាំងអស់ ទៅការិយាល័យជំនាញ ដើម្បីចាត់ការតាមនីតិវិធី ៕