មិនគួរនោះទេ!!! មហាជនជាច្រើន រិះគន់ទៅលើព្រះសង្ឃដែលចូលទៅបិណ្ឌបាត្រ ក្នុងផ្សារលក់ត្រីសាច់ គឺការប្រព្រឹត្តខុសវិន័យពុទ្ធប្បញ្ញត្តិ របស់សង្ឃ

ភ្នំពេញៈ អ្នកគ្រប់គ្រង និង បុគ្គលិកសន្តិសុខផ្សារនានានៅទូទាំងប្រទេស ជាពិសេសសន្តិសុខនៅតាមបណ្តាផ្សារក្នុងរាជធានីភ្នំពេញ មិនគប្បី ឬ មិនត្រូវ អនុញ្ញាតព្រះសង្ឃ ចូលបិណ្ឌបាត្រនៅក្នុងទីផ្សារ ដូចជាផ្សារលក់ត្រី លក់សាច់ឡើយ ព្រោះការអនុញ្ញាតព្រះសង្ឃធ្វើបែបនោះ គឺជាការរួមចំណែកឱ្យព្រះសង្ឃប្រព្រឹត្តខុសវិន័យពុទ្ធប្បញ្ញត្តិផង និង បម្រាមរបស់សង្ឃផង ។ នៅក្នុងទីផ្សារលក់ត្រីលាយឡំទៅដោយក្លិនស្អុយឆ្អេះឆ្អាប មានត្រីតូចធំ កំពុងបម្រះត្រដរ ហើយត្រូវគេពិឃាតហូរឈាមរឡាក់គួរសង្វេគ និង សាច់សត្វស្រស់ទាំងផ្ទាំងៗ ដ៏គួរស្ញែងញញើត និង កកកុញទៅដោយមនុស្ស ភាគច្រើនជាមនុស្សស្រីផង ជាញឹកញាប់ ត្រូវបានគេឃើញព្រះសង្ឃបែរជានិមន្តបិណ្ឌបាត្រនៅទីទាំងនោះ ហាក់គ្មានទើសទាស់រង្កៀសចិត្តអ្វីទាល់តែសោះ ។

ប៉ុន្តែវាបែរជាបង្កើតបាននូវភាពឃ្នើសទើសភ្នែក ទង្គឹះចិត្តដ៏ពិបាកទ្រាំ ដល់មហាជន ហើយជាញឹកញាប់ ដោយទ្រាំមិនបាន ពួកគេក៏បានបន្លឺឡើងនូវពាក្យនិន្ទារិះគន់ចំពោះសង្ឃដែលនិមន្តបិណ្ឌបាត្រនៅក្នុងទីផ្សារលក់ត្រី លក់សាច់នោះដោយប្រការផ្សេងៗ ហើយក៏ចេះតែចោទជាសំណួរថា ព្រះសង្ឃនិមន្តបិណ្ឌបាត្រទីផ្សារបែបនោះ ជារឿងខុស ឬ យ៉ាណា ។ ជាការពិតហើយ គ្មានអ្វីសង្ស័យទេ ព្រះសង្ឃនិមន្តបិណ្ឌបាត្រនៅតាមទីផ្សារលក់ត្រី លក់សាច់ គឺជាកំហុស ហើយមានកំហុសដល់ទៅ ២យ៉ាង ឬ អាចនិយាយបានថា គឺជារឿងខុសទាំងស្រុង គឺទី១ ខុសចំពោះវិន័យជាពុទ្ធប្បញ្ញត្តិ ហើយកំហុសទី២ គឺខុសចំពោះបម្រាមរបស់សង្ឃ ។ នេះមិនទាន់គិតដល់ថា បុគ្គលសង្ឃទាំងនោះ ជាអ្នកបួសតាមច្បាប់សាសនា និង ច្បាប់រដ្ឋ ឬ ក៏ជាសង្ឃក្លែងបន្លំផង ព្រោះកន្លងមកស្ថាប័នសាសនា ក៏ធ្លាប់បានរកឃើញជនក្លែងជាសង្ឃដើរបិណ្ឌបាត្ររៃអង្គាសច្រើនករណីណាស់ហើយដែរ ។

កំហុសទី១ គឺខុសចំពោះពុទ្ធប្បញ្ញត្តិនោះ គឺបើតាមវិន័យជាពុទ្ធប្បញ្ញត្តិ ទីផ្សារលក់ត្រី លក់សាច់ ដូចដែលបានលើកឡើងខាងដើមមកនេះ ត្រូវបានចាត់ចូលជា ” អគោចរដ្ឋាន ” ពោលគឺ ” ទីដែលបព្វជិត គឺអ្នកបួស ឬ ព្រះសង្ឃ មិនគប្បីត្រាច់ទៅកាន់ ”។ កំហុសទី២ គឺកំហុសចំពោះបម្រាមរបស់សង្ឃនោះ គឺដោយសារបានឮការនិន្ទាពីសាធារណជន ដូចដែលបានលើកឡើងដោយសង្ខេបខាងលើ សាលាគណរាជធានីភ្នំពេញ បានចេញបម្រាម ១ បន្ថែមពីលើវិន័យពុទ្ធប្បញ្ញត្តិ ដែលមានឈ្មោះថា ” សេចក្តីណែនាំស្តីពីការប្រើប្រាស់ប័ណ្ណគោចរបិណ្ឌបាត្រក្នុងរាជធានីភ្នំពេញ ” ។ ចំណុចទី៣ នៃបម្រាមនេះ បានចែងថា ” មិនត្រូវបានអនុញ្ញាតឱ្យនិមន្តបិណ្ឌបាត្រតាមទីអគោចរដ្ឋាន រួមមាន ក្នុងទីផ្សារ ចំណតរថយន្ត មុខមន្ទីរពេទ្យ មុខរោងចក្រសហគ្រាស មុខភោជនីយដ្ឋាន តាមអាគារមានជាន់ (ព្រោះធ្លាប់មានព្រះសង្ឃឡើងទៅបិណ្ឌបាត្រដល់អាគារជាន់ទី១ ជាន់ទី២ …. ) និង ទីប្រជុំជននានា ដែលជាទីកន្លែងមិនគាប់ភ្នែក នៃ មជ្ឈដ្ឋានពុទ្ធបរិស័ទ ” ។

សាលាគណរាជធានីភ្នំពេញ បានស្នើសុំកិច្ចសហការពីជនានុជន ជាពិសេសពីអាជ្ញាធរគ្រប់លំដាប់ថ្នាក់ ដើម្បី ទប់ស្កាត់នូវការនិមន្តបិណ្ឌបាត្រនៅតាមទីមិនសមរម្យទាំងឡាយ មានទីផ្សារលក់ត្រី និង សាច់ជាដើម ។ ដោយហេតុនេះ ព្រះភិក្ខុ សុំ សុខា ព្រះសមុហ៍គណរាជធានីភ្នំពេញ បានមានព្រះថេរដីកាថា ក្នុងករណីបានឃើញព្រះសង្ឃនិមន្តបិណ្ឌបាត្រក្នុងទី ឬ ក្នុងពេលមិនសមរម្យ ដូចដែលបានលើកឡើងខាងលើជាដើម គប្បីផ្តល់ដំណឹងដល់សាលាគណរាជធានីភ្នំពេញ ឬ អាជ្ញាធរមូលដ្ឋាន ដើម្បី ចាត់វិធានការតាមច្បាប់សាសនា ហើយអាចនឹងតាមច្បាប់រដ្ឋ ប្រសិនបើពាក់ព័ន្ធ ៕ ប្រភពៈ Heng Ly

ហាមដាច់ខាតការយកអត្ថបទ ពីវេបសាយ khmernews.news ដោយគ្មានការអនុញាត។