ភ្នំពេញៈ នៅថ្ងៃទី២៥ ខែកក្កដា ឆ្នាំ២០១៨នេះ យោងតាមរបាយការណ៍ ពីមន្ទីរក្រសួងធនធានទឹក និងឧតុនិយមរបស់ ខេត្តស្ទឹងត្រែងបានឲ្យដឹងថា គិតត្រឹមម៉ោង១៧ថ្ងៃទី២៥ ខែកក្កដា កំពស់ទឹកទន្លេសេកុងមានប្រវែង ១១.៥០ម៉ែត្រ ក្នុងកម្រិតប្រកាសអាសន្ន។ ក្នុងនោះ កម្លាំងអន្តរាគមន៍សរុប៥២៩នាក់ បានជួយប្រជាពលរដ្ឋ ដែលរងផលប៉ះពាល់ចំនួន១៧ភូមិ ដែលបានជម្លៀស ចំនួន១.២៨៩គ្រួសារ មានមនុស្សចំនួន៥.៦១៩នាក់ ស្មើនឹង៤១.៩៣% នៃចំនួនគ្រួសាររងគ្រោះ ចំនួន៣.០៧៤គ្រួសារ ដែលមានមនុស្សចំនួន១៥.៣១៥នាក់ ក្រោយរងគ្រោះ ដោយសារទឹកជំនន់ ដែលបាក់ទំនប់វារីអគ្គិសនីពី ខេត្តអត្តពឺ របស់ប្រទេសឡាវ កាលពីថ្ងៃទី២៤ ខែកក្កដា ឆ្នាំ២០១៨ ។

រីឯគ្រួសារសរុប ក្នុងស្រុកសៀមប៉ាង មានចំនួន៥.២៥៥គ្រួសារ មនុស្សចំនួន២៥.៦១០នាក់ និងជម្លៀសសត្វពាហនៈ គោចំនួន១.២៤៣ក្បាល ក្របីចំនួន១.៦៩៣ក្បាល មាន់ចំនួន៣.៤៥៣ក្បាល ទាចំនួន១.៩៩៣ក្បាល ជ្រូកចំនួន២.០៨០ក្បាល ៕