ភ្នំពេញៈ ដោយមើលឃើញថា នាពេលនាថ្មីៗនេះ មានជនជាតិចិន មួយចំនួន រស់នៅខេត្ត ព្រះសីហនុ និងតាមបណ្ដាខេត្តផ្សេងៗទៀត បានបង្កបញ្ហាមិនចេះ មិនចេះហើយ ជាច្រើន ករណីនោះ ភារៈធារី នៃស្ថានទូតចិនប្រចាំនៅកម្ពុជា លោក ជា លី បានបញ្ជាក់ថា ប្រសិន បើមានជនជាតិចិនណាមួយ បង្កបញ្ហានៅខេត្តព្រះសីហនុ ដូច្នេះអាជ្ញាធរខេត្តព្រះសីហនុ ត្រូវផ្តល់ដំណឹងទៅស្ថានទូត ដើម្បីជួយសហការ ក្នុងការដោះស្រាយ។ នេះបើតាមការផ្សព្វ ផ្សាយពីវេបសាយ របស់រដ្ឋបាល ខេត្តព្រះសីហនុ។

ក្នុងជំនួបពិភាក្សា ការងារជាមួយលោក យន្ត មីន អភិបាលខេត្តព្រះសីហនុ កាលពីថ្ងៃទី២៣ ខែកក្កដា ឆ្នាំ២០១៨ លោកជា លី ក៏បានកោតសរសើរ ខេត្តព្រះសីហនុមានការរីក ចំរើន គួរឲ្យកត់សំគាល់ ខណៈវត្តមានអាគារខ្ពស់ៗបាននឹងកំពុងរីកព្រោងព្រាត នៅខេត្តនេះ។ លោកបន្តថា “ប្រសិនបើមានជនជាតិចិន ណាបានមកបង្កបញ្ហា នៅខេត្តព្រះសីហនុ សូម អាជ្ញាធរខេត្តព្រះសីហនុ ជួយផ្តល់ដំណឹងទៅស្ថានទូតផង ដើម្បីជួយសហការដោះស្រាយ ធ្វើយ៉ាងណាឲ្យសាធារណៈជនទូទៅ អាចផ្តល់សេចក្ដីទុកចិត្តបាន។ តាមរយៈទំនាក់ ទំនងល្អ រវាងកម្ពុជានិងចិន ដែលមានស្រាប់ភាគីទាំងពីរ គឺជាមិត្តល្អមួយគ្នាជានិច្ច”។ លោក ជា លី អះអាងថា ចិនគាំទ្រគោលនយោបាយរបស់រាជរដ្ឋាភិបាលកម្ពុជា ដូច្នេះចិននឹង ប្តេជ្ញា ជំរុញឲ្យមានការអភិវឌ្ឍថែមទៀត លើវិស័យ វិនិយោគនិងសន្តិសុខផងដែរ។ ក្នុងឱកាសនោះ លោក យន្ត មីន អភិបាលខេត្តព្រះសីហនុ មានប្រសាសន៍ថា ខេត្តព្រះសីហនុ ស្វាគមន៍អ្នកវិនិយោគ និងទេសចរណ៏គ្រប់សញ្ជាតិដោយ មិនកាន់ជាតិសាសន៍ឡើយ។ លោកអះអាងថា ខេត្តធានាចំពោះសន្តិសុខ សុវត្ថិភាពដល់ពលរដ្ឋខ្មែរ អ្នកវិនិយោគ និងភ្ញៀវទេសចរគ្រប់ជាតិសាសន៍។ លោកថា ខេត្តព្រះសីហនុ មានសមត្ថភាព គ្រប់គ្រាន់ ក្នុងការការពារទប់ស្កាត់ ដើម្បីបុព្វហេតុសន្តិសុខ សុវត្ថិភាព ដូច្នេះកុំមានការព្រួយ បារម្ភអ្វីឡើយ។ លោក ទិត ចន្ថា រដ្ឋលេខាធិការក្រសួងទេសចរណ៍ ធ្លាប់បានឲ្យដឹងថា នាពេលខាងមុខ ភ្ញៀវទេសចរចិន នឹងមកកម្ពុជាប្រមាណ២លាននាក់ ក្នុងមួយឆ្នាំ ឬអាចមកច្រើនជាង ២លាននាក់៕ ប្រភពៈ DAP