កណ្តាលៈ កាលពីវេលាម៉ោង៧ៈ៣០នាទីយប់ ថ្ងៃទី២៣ ខែកក្កដា ឆ្នាំ២០១៨ ជនសង្ស័យម្នាក់ ក្នុងចំណោមគ្នា២នាក់ បានធ្វើសកម្មភាពឆក់កាបូបពីនារីម្នាក់ មិនបានសម្រេច នៅផ្លូវជាតិលេខ៤ ភូមិចុងបង្គោល ឃុំបែកចាន ស្រុកអង្គស្នួល ខេត្តកណ្តាល ត្រូវបានសមត្ថកិច្ចធ្វើការឃាត់ខ្លួនបានម្នាក់ និងម្នាក់ទៀតរត់គេចខ្លួនបាត់។

នារីរងគ្រោះមានឈ្មោះ វណ្ណ: ស្រីនន់ ភេទស្រី អាយុ១៨ឆ្នាំ មុខរបរ និស្សិតពេទ្យឆ្នាំទី១ នៅភូមិអង្គស្នួលទី២ ឃុំពើក ស្រុកអង្គស្នួល ខេត្តកណ្តាល។ ចំណែកជនសង្ស័យទាំង២នាក់ មានឈ្មោះ វណ្ណា វណ្ណេត ភេទប្រុស អាយុ១៦ឆ្នាំ មុខរបរ មិនពិតប្រាកដ រស់នៅភូមិថ្មដា សង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញ (ឃាត់ខ្លួន) ។ និងម្នាក់ទៀតឈ្មោះ ខែម ម៉េងលន់ ហៅគុណ ភេទប្រុស អាយុ២០ឆ្នាំ មុខរបរសិស្ស នៅភូមិព្រៃបឹង ឃុំបែកចាន ស្រុកអង្គស្នួល ខេត្តកណ្តាល(គេចខ្លួន)។ សម្ភារៈដែលឆក់បានរួមមាន ទូរស័ព្ទដៃម៉ាក iPhone7 plus ពណ៌ខ្មៅ១គ្រឿង កាបូបដៃពណ៌សុកូឡា១ លុយខ្មែរ៥៥.៥០០រៀល ក្រវិលប្រាក់១គូ តែយកបានមកវិញ។ រីឯមធ្យោបាយធ្វើសកម្មភាព ម៉ូតូម៉ាកសង់០១៨ ពណ៌ខ្មៅ ពាក់ស្លាកលេខ ភ្នំពេញ 1Y-6172។