ខេត្តសៀមរាប​ ៖​ ករណីគ្រោះថ្នាក់ចរាចរណ៍ដ៏រន្ធត់មួយបណ្ដាលឲ្យមនុស្ស​៨នាក់ត្រូវបានរងរបួសធ្ងន់​ ក្នុង​ ចំណោម​អ្នកទាំងនោះ​ មានម្នាក់បានស្លាប់​បាត់បង់ជីវិត ព្រោះតែរថយន្ត៤គ្រឿងបុកតកន្ទុយគ្នា​យ៉ាងសាហាវ ។

ហេតុការណ៍​គ្រោះថ្នាក់ចរាចរណ៍ដ៏រន្ធត់ខាងលើនេះ បានកើតឡើងនៅវេលាម៉ោង៣រសៀល ថ្ងៃទី១៧ ខែមិថុនា ឆ្នាំ២០១៨ ស្ថិតនៅឃុំក្រឡាញ់ ស្រុកក្រឡាញ់ ខេត្តសៀមរាប។ តាមប្រភពព័ត៌មានបានឲ្យដឹងថា មានករណីរថយន្ត​បុកកបន្តកន្ទុយគ្នា ៤គ្រឿងក្នុងនោះមានរថយន្តដឹកជ្រូកមួយគ្រឿងនិងរថយន្តតូច៣គ្រឿងទៀត កាលពីម៉ោងជិត៣រសៀលថ្ងៃទី១៧ ខែមិថុនា ឆ្នាំ២០១៨ ស្ថិតនៅឃុំក្រឡាញ់ ស្រុកក្រឡាញ់ ខេត្តសៀមរាប។ លោកវរសេនីយ៍ឯក ជី បេងជន អធិការនគរបាលស្រុកក្រឡាញ់ បានឲ្យដឹងថា រថយន្តទាំង៤គ្រឿងដែលបានបុកបន្តគ្នានេះគឺ រថយន្តទីមួយម៉ាកកាមរីឆ្លាម , ទី២ម៉ាកលុចស៊ីស RX330 ទី៣ ម៉ាកហាយឡែនឌរ័ និងទី៤រថយន្តកូរ៉េដឹកជ្រូក បណ្ដាលឲ្យមនុស្សរបួសធ្ងន់និងស្រាលចំនួន៨នាក់ ហើយត្រូវបានសមត្ថកិច្ចដឹកទៅសង្គ្រោះនៅមន្ទីរពេទ្យកន្លែងផ្សេងៗគ្នា ។ លោកបញ្ជាក់ថា រថយន្តដែលបង្កឲ្យមានគ្រោះថ្នាក់​ ចរាចរណ៍​នេះ គឺរថយន្តកូរ៉េដឹកជ្រូក ហើយក្នុងចំណោមអ្នករងគ្រោះទាំង៨នាក់នេះ មានជនរងគ្រោះម្នាក់ ភេទប្រុស បានស្លាប់នៅមន្ទីរពេទ្យ ៕​