ភ្នំពេញ៖ បុរសនារី៣នាក់ ធ្វើដំណើរដោយរថយន្ដមួយគ្រឿងម៉ាកកាមរីហាព្រឺក ក្នុងល្បឿនលឿន និងស្ថិតក្នុងស្ថានភាពស្រវឹងស្រា រួមទាំងមិនប្រយ័ត្នចំណុចផ្លូវបំបែកជាបួន ក៏ជ្រុលទៅបុករថយន្ដម៉ាកCRCមួយគ្រឿងទៀតបណ្ដាលឲ្យរថយន្ដទាំងពីរគ្រឿងរងការខូចខាតផ្នែកខាងមុខយ៉ាងធ្ងន់ធ្ងរ តែមិនបង្កអោយមានអ្នករងរបួសនោះទេ។

ហេតុការណ៍គ្រោះថ្នាក់ចរាចរណ៍នេះបានកើតឡើងនៅវេលាម៉ោង០១និង៣០នាទី រំលងអាធ្រាតឈានចូលថ្ងៃទី១៤ ខែមិថុនា ឆ្នាំ២០១៨ នៅចំណុចផ្លូវបំបែកជាបួនផ្លូវលេខ៥១ កែងផ្លូវលេខ១៧៨ ក្នុងសង្កាត់ផ្សារថ្មីទី៣ ខណ្ឌដូនពេញ រាជធានីភ្នំពេញ។ បើតាមការអោយដឹងពីសន្តិសុខម្នាក់ដែលយាមនៅជិតកន្លែងកើតហេតុបានអោយដឹងថា នៅមុនពេលកើតហេតុគេបានឃើញរថយន្ដម៉ាកកាមរីហាយព្រឺក មួយគ្រឿងពណ៍ទឹកប្រាក់ ពាក់ស្លាកលេខភ្នំពេញ2W-1011 ធ្វើដំណើរដោយបុរសនារី៣នាក់ស្ថិតក្នុងស្ថានភាពស្រវឹងស្រា បើកបរតាមបណ្ដោយផ្លូវលេខ១៧៨ទិសដៅពីកើតទៅលិចក្នុងល្បឿងលឿន លុះពេលមកដល់ចំណុចផ្លូវបំបែកជាបួនមិនបន្ថយល្បឿនក៏ជ្រុលបុករថយន្ដម៉ាកCRVពណ៍ទឹកប្រាក់ ពាក់ស្លាកលេខភ្នំពេញ2R-8479 ដែលធ្វើដំណើរតាមបណ្ដោផ្លូវលេខ៥១ទិសដៅពីជើងទៅត្បូងបណ្ដាលអោយរថយន្ដទាំងពីគ្រឿងខូចខាតផ្នែកខាងមុខស្ទើរទាំងស្រុងតែមិនបណ្ដាលអោយមានអ្នករងរបួសនោះទេ។ ក្រោយពីកើតហេតុភាគីទាំងសងខាងបានប្រកែកយកត្រូវរៀងៗខ្លួនអស់រយះពេលយ៉ាងយូ តែដោយមានការសម្របសម្រួលពីសមត្ថកិច្ចនិងនិយាយហេតុប្រាប់ខ្លះទើបភាគីខាងរថយន្ដកាមរីហាយព្រីកព្រមយករថយន្ដCRVទៅជួលជុលឲ្យស្អាតឡើងវិញ ដើម្បីបញ្ចប់រឿង៕ ដោយ៖ ភារ៉ា