ភ្នំពេញ៖ ក្នុងសេចក្តីថ្លែងការណ៍ដែលបានចេញផ្សាយនៅថ្ងៃនេះ រដ្ឋមន្ត្រីក្រសួងការពារជាតិកម្ពុជា នាយឧត្តមសេនីយ៍ ទៀ សីហា បានឆ្លើយតបចំពោះការលើកឡើងរបស់សមភាគីថៃ គឺអនុរដ្ឋមន្ត្រីក្រសួងការពារជាតិ នាយឧត្តមសេនីយ៍ Natthapon Nakpanich។
ការបញ្ជាក់នេះធ្វើឡើងបន្ទាប់ពីកិច្ចសម្ភាសន៍កាលពីពេលថ្មីៗនេះ ដែលឧត្តមសេនីយ៍ Natthapon បានស្នើសុំឲ្យមានឆន្ទៈក្នុងការពិភាក្សាជាមួយក្រសួងការពារជាតិកម្ពុជា ទាក់ទងនឹងបញ្ហាព្រំដែន។
លោក សីហា បានលើកឡើងអំពីបញ្ហានេះ ដោយបញ្ជាក់ថា ចាប់តាំងពីជំនួបចុងក្រោយជាមួយលោក Phum Tham រដ្ឋមន្ត្រីក្រសួងការពារជាតិថៃ នៅខេត្តស្រះកែវ មិនទាន់មានការពិភាក្សាផ្លូវការ ឬក្រៅផ្លូវការរវាងកម្ពុជា និងថៃឡើយ។
រដ្ឋមន្ត្រីក្រសួងការពារជាតិកម្ពុជា សង្កត់ធ្ងន់ថា លោកគោរពតាមបទបញ្ជារបស់លោកនាយករដ្ឋមន្ត្រី ហ៊ុន ម៉ាណែត និងរាជរដ្ឋាភិបាលកម្ពុជា។
លោករដ្ឋមន្ត្រី សីហា បានបញ្ជាក់ជាថ្មីថា៖ «មិនមែនកម្ពុជា ជាអ្នកបិទច្រកព្រំដែននោះទេ គឺកងទ័ពថៃជាអ្នកបិទច្រក ឬកែសម្រួលពេលវេលានៃការបិទច្រកព្រំដែនដោយឯកតោភាគី»។
លោកក៏បានឆ្លើយតបទៅនឹងការលើកឡើងរបស់នាយឧត្តមសេនីយ៍ Natthapon ទាក់ទងនឹងការបិទព្រំដែន និងការកែសម្រួលម៉ោងប្រតិបត្តិការនៃច្រកព្រំដែន។
លោកបានបញ្ជាក់ថា មានតែភាគីថៃ ឬកងទ័ពថៃតែប៉ុណ្ណោះដែលអាចដោះស្រាយបញ្ហានេះដោយខ្លួនឯង និងមិនចាំបាច់ចរចាជាមួយភាគីកម្ពុជាឡើយ។ កូនសោគឺស្ថិតលើដៃរបស់កងទ័ពថៃតែមួយគត់។
លោក Natthapon លើកឡើងថា ទោះបីជាស្ថានការណ៍នៅតាមបណ្តោយព្រំដែនកម្ពុជា-ថៃ មិនមានភាពធូរស្រាលក៏ដោយ ក៏មានការចង្អុលបង្ហាញជាវិជ្ជមាននៃវឌ្ឍនភាព ដូចដែលបានរាយការណ៍ដោយ Nation Thailand។លោកបានលើកឡើងពីឆន្ទៈរបស់រដ្ឋមន្ត្រីក្រសួងការពារជាតិកម្ពុជា នាយឧត្តមសេនីយ៍ ទៀ សីហា ក្នុងការពិភាក្សាជាមួយក្រសួងការពារជាតិថៃ ទោះបីជាលោកទទួលស្គាល់ថាបញ្ហាមួយចំនួននៅតែត្រូវបានពិភាក្សានៅឡើយ។
ទាក់ទិននឹងសំណុំរឿងកម្ពុជានៅតុលាការយុត្តិធម៌អន្តរជាតិ (ICJ) ដែលស្វែងរកយុត្ដិធម៌ពីអធិបតេយ្យភាពលើប្រាសាទបុរាណខ្មែរចំនួនបី និងតំបន់មុំ ៣ នោះ លោក Natthapon បានបញ្ជាក់ថា បញ្ហានេះស្ថិតនៅក្រោមដែនសមត្ថកិច្ចរបស់ក្រសួងការបរទេស។ លោកបានបញ្ចប់ថា៖ «ក្រសួងការពារជាតិនឹងមិនជ្រៀតជ្រែកទេ ហើយនឹងទុកបញ្ហានេះទាំងស្រុងទៅក្រសួងការបរទេស»៕
.jpg?1751610233)
.jpg?1751610233)
