នៅព្រឹកថ្ងៃទី២៦ ខែឧសភា ឆ្នាំ២០២៥នេះ ក្រុមអន្តរាគមន៍បង្ក្រាបបទល្មើសចលនាសត្វ នៃអគ្គនាយកដ្ឋានសុខភាពសត្វ និងផលិតកម្មសត្វ បានស្ទាក់ចាប់រថយន្តមួយគ្រឿង ម៉ាក SSANGYONG ISTANA ពណ៌លឿង ពាក់ស្លាកលេខ ភ្នំពេញ 2R-6203 ដឹកពងមាន់ចំនួន៨៥ដុំ ស្មេីនឹង២៥៥០០គ្រាប់ ដែលឈ្មួញលួចនាំចូលពីប្រទេសវៀតណាម តាមច្រករបៀង ស្រុកគិរីវង់ ខេត្តតាកែវ ឆ្ពោះមកលក់ចែកចាយនៅរាជធានីភ្នំពេញ។
ការបង្ក្រាបពងមាន់គ្មានលិខិតអនុញ្ញាតនេះ ធ្វើឡេីងនៅវេលាម៉ោង០៦ និង៥០នាទីព្រឹកថ្ងៃទី២៦ ខែឧសភា ឆ្នាំ២០២៥ ជិតរង្វង់មូលកួរស្រូវ សង្កាត់ព្រែកកំពឹស ខណ្ឌដង្កោ រាជធានីភ្នំពេញ។
កាលពីថ្ងៃទី៨ ខែឧសភា ឆ្នាំ២០២៥កន្លងទៅ ថ្លែងក្នុងកិច្ចប្រជុំសមាជិកក្រុមប្រឹក្សាខេត្តតាកែវ ឯកឧត្ដម វ៉ី សំណាង អភិបាលនៃគណៈអភិបាលខេត្តតាកែវ បានដាក់បញ្ជាយ៉ាងម៉ឺងម៉ាត់អោយមន្ត្រីប្រចាំការនៅច្រកទ្វារតាមព្រំដែនទាំងអស់រវាងខេត្តតាកែវ និងខេត្តអានយ៉ាង និងខេត្តគៀងយ៉ាង ប្រទេសវៀតណាម ត្រូវទប់ស្កាត់អោយបានពីការនាំចូលពងមាន់ ពងទា និងសាច់បង្កកខុសច្បាប់ចូលមកប្រទេសកម្ពុជា៕
