ភ្នំពេញ៖ នៅ​ថ្ងៃទី១៧​ ខែសីហា ​ឆ្នាំ២០១៨ លោកឃួង ស្រេង អភិបាលរាជធានីភ្នំពេញ បាន​បញ្ជា​ឲ្យ​សមត្ថកិច្ច​ចុះ​បិទ​ទីតាំង​ម៉ាស្សា “ភ្នំពេញ​ទីមួយ” និង​តាម​ស្វែងរក​ចាប់ខ្លួន​ក្រុម​ដែល​ចែក​ខិត្តប័ណ្ណ​មាន​រូប​ស្រើប​ស្រា ដើម្បី​ធ្វើការ​សាកសួរ។

ខិត្តប័ណ្ណរូបស្រីចិនស្លៀកស៊ិចស៊ីបង្ហាញភាពស្រើបស្រាល និងរូបបុរសចិនស្រាតននលគោកជាច្រើនសន្លឹក ត្រូវបានដើរចេញនៅតាមតំបន់សំខាន់មួយចំនួន នៅក្នុងរាជធានីភ្នំពេញ ដែលជាហេតុធ្វើឲ្យមានការភ្ញាក់ផ្អើលយ៉ាងខ្លាំង។ ខិត្តប័ណ្ណ​បែបនេះ កាលពីពេលកន្លងមក គឺមានការចែកចាយនៅក្រុងព្រះសីហនុ ដែលជាខេត្តមួយសំបូរទៅដោយ ភ្ញៀវទេសចរជាច្រើនជាតិសាសន៍មកដើរលេងកំសាន្ត។ នាពេលកន្លងមកសមត្ថកិច្ចក៏បានធ្វើការឃាត់ខ្លួនជនជាតិចិនផងដែរ ស្រាប់តែមិនទាន់បានប៉ុន្មានផង ក៏មានការចែកខិត្តប័ណ្ណនៅក្រុងភ្នំពេញ ធ្វើព្រងើយ។ ខិត្តប័ណ្ណនោះមានផ្ទៃពណ៌ផ្កាឈូក មានសរសេរអក្សរខ្មែរ “ភ្នំពេញទីមួយ” និងមានសរសេរអក្សរចិន និងអង់គ្លេស (Health massage) អមជាមួយ និងថែមទាំងមានដាក់លេខទូរស័ព្ទទំនាក់ទំនងថែមទៀតផង។ ដោយ៖ និស្ស័យ