ភ្នំពេញៈ កាលពីវេលាម៉ោង៣ៈ១៥នាទីរសៀល ថ្ងៃទី២២ ខេកក្កដា ឆ្នាំ២០១៨ នារីសាច់សស្រស់ទងវង មិនដឹងជាមកពីផឹកសុីនៅទីណានោះទេ មិនត្រូវបានស្គាល់អត្តសញ្ញាណឡើយ មានអាយុប្រហែល២១ឆ្នាំ ក្នុងស្ថានភាពធំក្លិនស្រាហួងតែម្តង ព្យាយាមជិះម៉ូតូ ទីបំផុតអំណាចនៃសុរា ឥទ្ធិពលនៃជាតិស្រវឹង គ្រប់គ្រងដៃចង្កូតលែងបាន ដួលបានសម្រេចតែម្នាក់ឯង របួសបែកមុខមាត់ ខូចអស់សម្រស់អស់ ស្ថិតនៅតាមផ្លូវក្នុងតំបន់សេដ្ឋកិច្ចភ្នំពេញ ភូមិព្រៃបឹង សង្កាត់កន្ទោក ខណ្ឌពោធិសែនជ័យ ។

តាមអ្នកឃើញហេតុការណ៍បានឲ្យដឹងថា មុនកើតហេតុ គេឃើញនារីខាងលើជិះម៉ូតូម្នាក់ឯង ម៉ាកហុងដាសេ ១២៥ សេរី២០១៨ ពណ៌ខ្មៅ ពាក់ស្លាកលេខ កណ្តាល 1Z-3186 ក្នុងស្ថានភាពស្រវឹង រេពេញផ្លូវ ពីកើតទៅលិច លុះដល់ចំណុចកើតហេតុ ទប់ចង្កូតលែងជាប់ ដួលភីងម្នាក់ឯង បណ្តាលឲ្យរងរបួសបែកមុខ មាត់ ហូរឈាមកក្លាក់ ខូចអស់រលីងសម្ភាស្ស។ មិនត្រឹមតែប៉ុននិងនារីខាងលើក្រោយពីផឹកស្រវឹង ដួលបានសម្រេច របួសប៉ុណ្ណឹងហើយ និយាយប៉បុិចប៉ប៉ោច បបួលគេឯង រកស្រាផឹកទៀត ពិតជាចិត្តនារីក្លាហានមែន ដោយឃើញឈាមហូរច្រើនពេក ពលរដ្ឋ កម្មករ ក្បែរនោះជួយហៅ រករថយន្តសង្រ្គោះរបស់អង្គភាព៧១១ ទៅជួយដឹកយកទៅសង្រ្គោះ បែរជានារីរូបនេះ នៅតែបញ្ចេញចរឹកក្លាហាន បែរជាបបួល ក្រុមអ្នកសង្រ្គោះ ទិញស្រាផឹកសិន មុនយកគេទៅពេទ្យ « អស់ទាស់ហ្មង» ។ តែទោះជាយ៉ាងណាក្តី វិជ្ជាជីវៈ ជាអ្នកសង្រ្គោះ ជនរងគ្រោះក្នុងសភាពបែបណាក្តី ផ្តោតសំខាន់លើក្រមសិលធម៌ ថ្លៃថ្នូរ អនុវត្តន៍ទៅតាមជំនាញរបស់ខ្លួន ដើម្បីសង្រ្គោះអាយុជីវិតមនុស្ស ពោលមិនគិតពីជនរងគ្រោះក្នុងសភាពបែបណាក៏ដោយ ហើយដឹកបញ្ជូនទៅសង្រ្គោះនៅមន្ទីរពេទ្យព្រះកុសុមៈ ។ ជនរងគ្រោះស្ថិតក្នុងសភាពវង្វេងបាត់ស្មារតី និយាយលែងដឹងខុសត្រូវ ប្រជាពលរដ្ឋ អាជ្ញាធរ ក្រុមគ្រូពេទ្យ សូមអំពាវនាវផងដែរ ដល់សាច់ញាតិ ក្រុមគ្រួសារ មេត្តាមកជួយមើលថែ ផ្តល់កម្លាំងចិត្ត ដល់ជនរងគ្រោះ នៅមន្ទីរពេទ្យព្រះកុសុមៈ ៕