នៅថ្ងៃទី២២ កក្កដា ឆ្នាំមានព័ត៌មានមួយបានចុះផ្សាយថា  កាលពីម្សិលមិញតារាកំប្លែងវ័យក្មេង នីឡា ដែលត្រូវជាកូនស្រីបង្កើតរបស់លោក សុវណ្ណ រិទ្ធី ហៅលោកតា វិចទ័រ ដែលជាអ្នកដឹកនាំ និងជាអ្នកនិពន្ធរឿងកំប្លែងអោយក្រុមកំប្លែងនាយ ពែកមី បានបង្ហោះនៅក្នុងបណ្តាញសង្គម instagram រៀបរាប់ទាំងភិតភ័យ ក្រោយត្រូវចោរឆក់ទូរស័ព្ទដៃ។

កញ្ញា នីឡា បានឲ្យដឹងថា ខណៈពេលកញ្ញាកំពុងតែជិះ PassApp ហើយមើលរឿងភាគនៅលើទូរស័ព្ទ រំពេចនោះស្រាប់តែមានចោរមកធ្វើសកម្មភាពឆក់ទូរស័ព្ទដៃរបស់កញ្ញាតែម្តង។ ប៉ុន្តែសំណាងល្អ នីឡា ដឹងខ្លួនទាន់ ហើយក៏ឆក់ទូរស័ព្ទនោះមកវិញ បណ្តាលឲ្យមានការប្រទាញប្រទង់គ្នា រួចចោរនោះភ័យក៏ជិះរត់គេចខ្លួនបាត់ ដោយឆក់ទូរស័ព្ទមិនបានសម្រេចឡើយ។ ក្រោយកើតមានហេតុការណ៍ នីឡា បានភ័យយ៉ាងខ្លាំងរហូតដល់ស្លេកមុខស្លេកមាត់ទន់ជង្គង់ ហើយកញ្ញាក៏បានណែនាំកុំឲ្យបងប្អូនប្រជាពលរដ្ឋទាំងអស់ចុចទូរស័ព្ទនៅលើរ៉ឺម៉កកង់៣ ដើម្បីជៀសវាងកុំឲ្យជួបហេតុការណ៍បែបនេះដូចកញ្ញា៕