ភ្នំពេញ ៖ ជាការពិតណាស់ លោកស្រីចៅក្រមស៊ើបសួរសាលាដំបូងរាជធានីភ្នំពេញ សម្រេចចេញដីកាឃុំខ្លួន មេតុងទីន អនឡាញ អឿន ម៉ូលីកា ដាក់ពន្ធនាគារជាបណ្តោះ ក្រោមការចោទប្រកាន់ពីបទ.រំលោភលើទំនុ កចិត្ត (មិនបំពេញកាតព្វកិច្ចចំពោះឧបករណ៍អាចជួញដូរបាន) ពោលគឺពាក់ព័ន្ធនិងការចេញមូលប្បទានប័តអត់សាច់ប្រាក់(សែកស្អុយ) ក្នុងរង្វង់ទឹកប្រាក់ ៣៦ ៥០០០ ដុល្លារអាមេរិក ។
ជនត្រូវចោទ ឈ្មោះ អឿន ម៉ូលីកា ភេទស្រី អាយុ២៧ ឆ្នាំ (១៩៩៥) មុខរបរ ជាអ្នករកស៊ី មានទីលំនៅផ្ទះលេខ១០ ផ្លូវលេខ បុរីវ៉ារីណា សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ ។
សំណុំរឿងខាងលើនេះបានស្ថិតនៅលោក អ៊ុំ សុភក្តិ ព្រះរាជអាជ្ញារង នៃអយ្យការអមសាលា ដំបូងរាជធានីភ្នំពេញ បើកការស៊ើបសួរ ក្រោយពីសួរចប់តំណាងអយ្យការបានធ្វើការចោទប្រកាន់ជនត្រូវចោទជាផ្លូវការ រួចបានចាត់បញ្ជូនទៅខាងចៅក្រម ។ សំណុំរឿងបានដល់ដៃលោកស្រី ទិត ដាលីន ចៅក្រមស៊ើបសួរសាលាដំបូងរាជធានីភ្នំពេញ ក្រោយពីការស៊ើបសួររយៈពេលពីរថ្ងៃ លោកស្រីចៅក្រមក៏បានសម្រេចចេញដីកាឃុំខ្លួនជនត្រូវចោទ ដាក់ពន្ធនាគារជាបណ្តោះអាសន្ន នៅកាលពីល្ងាចថ្ងៃទី១៨ ខែធ្នូ កន្លងទៅនេះ ។
តាមប្រភពព័ត៌មានបង្ហើបឲ្យដឹងថា ជនត្រូវចោទឈ្មោះ អឿន ម៉ូលីកា បានជាប់ពាក់ពន្ធលើពាក្យបណ្តឹង២ ដែលសុទ្ធតែជាបទល្មើសព្រហ្មទណ្ឌ ចេញសែកស្អុយ ស្មើទឹកប្រាក់ប្រមាណ ៣៦ ៥០០០ ដុល្លារអាមេរិក ។
ពាក្យបណ្តឹងទី១. អឿន ម៉ូលីកា ចេញមូលប្បទានប័តអត់សាច់ប្រាក់ចំនួន ៣០ ម៉ឺនដុល្លារអាមេរិកឲ្យទៅឈ្មោះ សម្ផស្ស សូលីដា អ្នកលេងតុងទីនជាមួយគ្នា និងពាក្យបណ្តឹងទី២ អឿន ម៉ូលីកា បានចេញមូលប្បទានប័តអត់សាច់ប្រាក់ឲ្យទៅឈ្មោះ ទី ចាន់នូ ចំនួន ៦៥ ០០០ ដុល្លារអាមេរិក ក៏ជាអ្នកលេងតុងទីនដែរ ដើម្បីយកទៅទិញរថយន្ត ដោយជនត្រូវចោទបានអះអាងថា ខ្ចីមិនដល់មួយខែទេ និងប្រគល់ប្រាក់សងវិញគ្រប់ចំនួន ទីបំផុតចេញសែកស្អុយមួយសន្លឹក ។ បច្ចុប្បន្នជនត្រូវចោទ អឿន ម៉ូលីកា ត្រូវបានបញ្ជូនទៅឃុំខ្លួននៅពន្ធនាគារព្រៃស ជាបណ្តោះអាសន្ន៕
ដោយឡែកអ្វីដែលគួរឲ្យចាប់អារម្មណ៍នោះគឺ ក្រោយឃើញមេតុងទីនអនឡាញ អឿន ម៉ូលីកា ត្រូវបានបានបញ្ជូនទៅឃុំខ្លួននៅពន្ធនាគារព្រៃស ជាបណ្តោះអាសន្ន ស្រាប់តែតារាសម្តែង អាណារ៉ូស ចេញមកសម្តែងក្តីអាណិតអាសូរ ដូច្នេះថា ៖
ស៊ូៗឡើងបងអ្វីគ្រប់យ៉ាងមិនទៀងទាត់ទេទុកជាមេរៀនរបស់យើងថ្ងៃក្រោយកុំទុកចិត្តអ្នកណាពេកធ្វើប្រហែសតែបន្តិចធ្វើឱ្យយើងបាត់បង់គ្រប់យ៉ាងសូម្បីតែមនុស្សធ្លាប់រាប់អានគ្នាធ្លាប់ស្គាល់គ្នាកន្លងមកប្រែក្លាយដូចអ្នកមិនដែលស្គាល់គ្នាតែបងកុំគិតច្រើននៅមានមនុស្សម្នាក់ដែលស្រឡាញ់បងយំរកបងរាល់ថ្ងៃកូនរបស់បងស្រឡាញ់បងខ្លាំងណាស់មិនចង់បានអ្វីពីម្ដាយទេចង់ឱ្យម្ដាយនៅជិតគាត់ផ្ដល់ភាពកក់ក្តៅអោយគាត់ស៊ូៗណាបង។
