ភ្នំពេញ ៖ កាលពីវេលាម៉ោង ២និង​៥០នាទីទាបភ្លឺ​ ឈានចូលថ្ងៃទី​២ ខែឧសភា​ ឆ្នាំ២០១៨​ ត្រង់ចំណុចក្បែររង្វង់មូលវិមានឯករាជ្យ តាមបណ្តោយផ្លូវ​ព្រះសុរាម្រិត​ ស្ថិតក្នុងសង្កាត់ចតុមុខ ខណ្ឌដូនពេញ​ រាជធានីភ្នំពេញ បុរសម្នាក់​ចេញពីក្លឹបផឹកស៊ី ស្រវឹងស្រា​ជោគ បើករថយន្ត​​​ក្នុង​ល្បឿន​យ៉ាងលឿន​ នៅចំណុចផ្លូវកោង ជិតវិមានឯករាជ្យ បួង​ចង្កូតមិនទាន់ ​ឡើង​ទៅលើ​ចិញ្ចើម​ផ្លូវ បុករះបង្គោលភ្លើង​ និងបង្គោលស្លាកចរាចរណ៍ បាក់អស់ជាច្រើនដើម និងបាក់សង្កត់លើថយន្ត Lexus មួយគ្រឿងទៀត រងការខូចខាតផ្នែកខាងក្រោយ។

ជនបង្កហេតុ ឈ្មោះ ខេង បើករថយន្ត ម៉ាក Range Rover ពណ៌ស្ករ ពាក់ស្លាកលេខ ភ្នំពេញ 2W-8558 បើកបរដោយបុរសម្នាក់ស្រវឹងស្រាជោគ ដំណើរតាមបណ្តោយផ្លូវព្រះសុរាម្រិត ពីកើតទៅលិច ក្នុងល្បឿនយ៉ាងលឿនដូចហោះ ខណៈមកដល់ចំណុចកើតហេតុ ផ្លូវកោង ជិតវិមានឯករាជ បួង​ចង្កូតមិនទាន់ ស្រាប់តែរថយន្តរេចង្កូត ឡើងចិញ្ចើមផ្លូវ បុកបង្គោលភ្លើង​ និងបង្គោលស្លាកសញ្ញាចរាចរណ៍​ ​បាក់អស់ជាច្រើនដើម ទៅប៉ះ​រថយន្តរងគ្រោះ ម៉ាកLexus RX300 ពាក់ស្លាកលេខ ភ្នំពេញ​ 2AO-9429 ។ ចំណែករថយន្តបង្ក កល់ជាប់បើកទៅមុខលែងរួច និងរងការខូចខាតស្ទើរទាំងស្រុង ។ បច្ចុប្បន្នជនសង្ស័យ ត្រូវបានសមត្ថកិច្ចនាំខ្លួនទៅ អធិការដ្ឋាន ដើម្បីរង់ចាំ ធ្វើការដោះស្រាយ សងការខូចខាតទៅតាមផ្លូវច្បាប់៕​ ដោយ៖ ច័ន្ទ