ភ្នំពេញ: កាលពីវេលាម៉ោង១ៈ៤០នាទីយប់រំលងអធ្រាត្រ ឈានចូលថ្ងៃទី៤ ខែមេសា ឆ្នាំ២០១៩ ស្ថិតនៅចំណុចមុខបុរីពិភពថ្មី ជិតរង្វង់មូលនាងបីគួរស្រូវ ស្ថិតក្នុងសង្កាត់ព្រែកកំពឹស ខណ្ឌដង្កោ។ មានហេតុការណ៏ភ្ញាក់ផ្អើលមួយ ដោយជនសង្ស័យមួយក្រុម បានធ្វើសកម្មភាពវាយប្លន់យកម៉ូតូ មួយគ្រឿងបានសម្រេច រួចគេចខ្លួនដោយសុវត្ថិភាព ពីយុវជនម្នាក់ មានឈ្មោះ យ៉ាន់ ពៅ ភេទប្រុស អាយុ២០ឆ្នាំ មុខរបរបើកឡាន ស្នាក់នៅម្តុំជិតស្តុបទួលពង្រ ក្នុងសង្កាត់ចោមចៅទី១ ខណ្ឌពោធិ៍សែនជ័យ ជិះម៉ូតូម៉ាកឌ្រីមសង់ ១២៥ ស៊េរី២០១៤ ពណ៌ខ្មៅ ពាក់ស្លាកលេខតាកែវ 1K-121។

បើតាមប្រភពពីជនរងគ្រោះ បានឲ្យដឹងថា នៅមុនពេលកើតហេតុ វេលាម៉ោង១ៈ៤០នាទី រំលងអធ្រាត្រថ្ងៃកើតហេតុ ជនរងគ្រោះបានជិះម៉ូតូខ្លួន រួមដំណើរនិងមិត្តភក្តិ ជាមួយម៉ូតូ២គ្រឿងទៀត មានគ្នា៤នាក់ បានចេញពីការផឹកស៊ីនៅក្នុងបុរីពិភពថ្មីចំការដូង  ក្នុងគោលបំណងជូនមិត្តភក្តិ ទៅកន្លែងដេក នៅចំណុចជិតកន្លែងកើតហេតុ តាមបណ្តោយផ្លូវ២១៧ ទិសដៅពីជើងទៅត្បូង។

មកដល់មុខរោងចក្រស្រាបៀរកម្ពុជា ក៏លេចមុខជនសង្ស័យ៣នាក់ ជិះម៉ូតូមួយគ្រឿង ម៉ាកហុងដា ZOOMER.X មិនចាំស្លាកលេខ មកពីក្រោយ ស្មានតែអ្នកដំណើរធម្មតា ស្រាប់តែមកដល់កន្លែងកើតហេតុខាងលើ ក៏ដេញវាយនិងខ្សែក្រវ៉ាត់ គប់ដុំថ្ម ហើយរូបគាត់ ក៏យកដៃរងត្រូវមួយដុំថ្មរងរបួសចេញឈាម ហើយពេលនោះ គាត់ក៏ផ្តួលម៉ូតូ ចោលស្ទុះរត់ចេញយកតែរួចខ្លួនតែម្ដង។ ខណ:នោះ ជនសង្ស័យបានឪកាស ក៏ចុះពីម៉ូតូរបស់ខ្លួន លើកយកម៉ូតូជនរងគ្រោះ ជិះចេញទៅបាត់ដោយសុវត្ថិភាព។

ក្រោយកើតហេតុ យុវជនរងគ្រោះ បានឲ្យមិត្តភ័ក្ត ដឹកទៅដាក់ពាក្យបណ្តឹងនៅប៉ុស្តិ៍ នគរបាលរដ្ឋបាលព្រែកកំពឹស ដើម្បីឲ្យសមត្ថកិច្ចជួយស្រាវជ្រាវតាមរកជនសង្ស័យ៕