ប្រុងប្រយ័ត្នផង នារីៗដែលចង់បានសាច់ស្អាត!!! ក្រសួងសុខាភិបាល ប្រកាសហាមដាច់ខាត មិនឲ្យប្រើប្រាស់សេរ៉ូម Glutaone 600 ឡើយព្រោះ....
ភ្នំពេញៈ ក្រសួងសុខាភិបាល កាលពីរសៀលថ្ងៃទី១៤ ខែសីហា ម្សិលមិញ បានអំពាវនាវដល់សាធារណជន សូមប្រុងប្រយ័ត្ន និងមិនត្រូវប្រើប្រាស់ ឬលក់ ផ្សព្វផ្សាយសេរ៉ូមឈ្មោះ Glutaone 600 ដោយសារតែផលិតផលនេះ មិនបានចុះបញ្ជី និងគ្មានការត្រួតពិនិត្យត្រឹមត្រូវពីក្រសួងឡើយ។
យោងតាមក្រសួងសុខាភិបាល បានឲ្យដឹងថា បន្ទាប់ពីពិនិត្យឃើញមានគណនី Facebook ចំនួន៤ ឈ្មោះ Phea Sreng, Nana Chang, Oeng Chhiv Yi និង ជេ-ជី សប កំពុងផ្សព្វផ្សាយលក់សេរ៉ូម Glutaone 600 (ជាប្រភេទឱសថ) ដោយផ្សព្វផ្សាយភូតកុហក បោកប្រាស់ និងបំផ្លើសហួសពីការពិត គ្មានមូលដ្ឋានវិទ្យាសាស្ដ្រត្រឹមត្រូវដូចជា ធ្វើឲ្យស្បែកស បែបស៊ីជម្ពូរ ជួយឲ្យស្បែកភ្លឺថ្លាម៉ត់រលោង ផ្ដល់សំណើមដល់ស្បែក បំបាត់មុន បំបាត់ស្នាមអុជខ្មៅ អាចម៌រុយ ជាំ ជំនួយក្រចក និងសក់ស្អាតពីចុងសក់ ដល់ចុងជើង។ ក្រសួងសុខាភិបាលសូមបញ្ចាក់ថា Glutaone 600 ជាផលិតក្នុងប្រទេសថៃ គ្មានអាស័យដ្ឋានច្បាស់លាស់ គ្មានក្រុមហ៊ុននាំចូលត្រឹមត្រូវ គ្មានចុះបញ្ជីការ គ្មានការត្រួតពិនិត្យគុណភាព និងគ្មានច្បាប់អនុញ្ញាតផ្សព្វផ្សាយ ពីក្រសួងសុខាភិបាលនោះឡើយ។ ដូចនេះដើម្បីជៀសវាង ការខាតបង់ប្រាក់កាស និងប៉ះពាល់ដល់សុខភាព ឬឈានដល់ការបាត់បង់អាយុជីវិត ក្រសួងសុខាភិបាល សូមស្នើឲ្យប្រជាពលរដ្ឋបញ្ឈប់ការប្រើប្រាស់សេរ៉ូម Glutaone 600 ជាបន្ទាន់។ ក្រសួង នឹងចាត់វិធានការតាមផ្លូវច្បាប់ ចំពោះម្ចាស់គណនីទាំង៤ខាងលើ តាមច្បាប់ស្ដីពីវិសោធនកម្មច្បាប់ ស្ដីពីការគ្រប់គ្រងឱសថជាធរមាន ៕ ប្រភពៈ ANN
ហាមដាច់ខាតការយកអត្ថបទ ពីវេបសាយ khmernews.news ដោយគ្មានការអនុញាត។