កំពង់ស្ពឺ ៖ ស្ពានអាកាសថ្មើរជើងមួយនៅខេត្តកំពង់ស្ពឺបានសាងសង់រយះពេល ៦ខែជាង ដែលមានកម្ពស់ ៥.៧ ម៉ែត្រ បណ្តោយ ៣៩.៣៩ ម៉ែត្រ ទទឹង ៣.៨០ ម៉ែត្រ សរុបអស់ថវិកាប្រមាណ ៣៤ម៉ឺនដុល្លា ក្រោមជំនួយឧបត្ថម្ភរបស់លោកស្រី សៀង ចាន់ហេង អគ្គនាយិកាក្រុមហ៊ុនហេងអភិវឌ្ឍន៍ ។
ស្ពានអាកាសថ្មើរជើងនេះនឹងចូលរួមចំណែកយ៉ាងធំធេង ក្នុងការលើកកម្ពស់សោភ័ណភាពមុខមាត់ខេត្តកំពង់ស្ពឺផងដែរ មិនតែប៉ុណ្ណោះក៏បានកាត់បន្ថយការកកស្ទះចរាចរណ៍ផងដែរ ។
យ៉ាងណាមិញនេះបើយោងទៅតាមគណនីហ្វេសប៊ុកដែលមានឈ្មោះថា Pich Vongvorleakraksa បានធ្វើការលើកឡើងឲ្យដឹងនៅលើបណ្តាញសង្គមហ្វេសប៊ុកថា ៖ ខ្ញុំបានមកមើលឃើញផ្ទាល់ភ្នែកហើយនូវស្ពានថ្មើជើង តម្លៃ៤០ម៉ឺនដុល្លារ ក្នុងក្រុមច្បារមន ខេត្តកំពង់ស្ពឺ។ ការពិតតម្លៃ៤០ម៉ឺនដុល្លារនេះធ្វើមិនទាន់រួចរាល់ផង នៅសរសរស្ពាន ជើងស្ពាន តួស្ពានទាំងមូលមិនទាន់លាបថ្នាំ បើលាបថ្នាំរួចរាល់ស្ពាននេះចំណាយខ្ទងលានដុល្លារឯណោះ។ (មើលហើយពិចារណាខ្លួនឯងទៅបងប្អូន)។ ចង់បបួលចៅហ្វាយខេត្តលោក វី សំណាង ស្បថអោយឡានបុកបើអស់៤០ម៉ឺនមែន។
គួរបញ្ចាក់ផងដែរថា គ្រាន់តែស្ពានអាកាសមួយនេះសាងសង់រួចភ្លាមហើយត្រូវបាន រដ្ឋបាលខេត្តកំពង់ស្ពឺបានរៀបចំពិធីសម្ពោធដាក់ឱ្យប្រើប្រាស់ជាផ្លូវការនូវស្ពានអាកាសថ្មើរជើងដែលឈ្មោះថា «តេជោសន្តិភាព» ដំបូងគេបង្អស់បន្ទាប់ពីរាជធានីភ្នំពេញ យើងឃើញថាមានបណ្តារមហាជនជាច្រើនបានផ្ទុះការរិះគន់នៅលើបណ្តាញសង្គមហ្វេសប៊ុកយ៉ាងខ្លាំង រហូតឈានដល់ការប្រៀបធៀបគ្នា រវាងស្ពាន ៤០ម៉ឺនដុល្លាររបស់ខ្មែរ និងស្ពានតម្លៃ ៥ ម៉ឺនដុល្លាររបស់ថៃ ។
