អាជ្ញាធរទីក្រុងហាណូយ បានព្រមានដ៏ពលរដ្ឋ ឲ្យបញ្ឈប់ប្រពៃណីទទួលទានសាច់ឆ្កែ ជាបន្ទាន់ព្រោះតែ.….
ហាណូយៈ កាលពីថ្ងៃអង្គារ មន្ដ្រីក្រុងហាណូយ បានទទូចពលរដ្ឋឲ្យបញ្ឈប់ប្រពៃណីទទួលទានសាច់ឆ្កែ ដោយបាននិយាយថា អាហារពេញនិយមនេះកំពុងតែបំផ្លាញមុខមាត់ទីក្រុង និងពង្រីកការរីករាលដាលនៃជំងឺឆ្កែឆ្កួត។ សាច់ឆ្កែអាំង ស្ងោរ និងចំហុយ អាចរកទិញបាននៅតាមផ្សារនានា និងភោជនីយដ្ឋានទូទាំងក្រុងហាណូយដែលល្បីល្បាញចំពោះអាហារតាមចិញ្ចើមផ្លូវដ៏ឈ្ងុយឆ្ងាញ់ ហើយសាច់ឆ្កែក្លែមជាមួយស្រាស ឬស្រាបៀរកាន់តែវិសេស។
ប៉ុន្ដែគណៈកម្មការប្រជាមានិតក្រុងហាណូយបានព្រមានពលរដ្ឋឲ្យបញ្ឈប់ប្រពៃណីទទួលទានសាច់ឆ្កែ ដើម្បីការពារជំងឺឆ្កែឆ្កួត និងជំងឺឆ្លងពីសត្វជាច្រើនទៀត។ គណៈកម្មការក៏បានទទូចពលរដ្ឋឈប់ទទួលទានសាច់ឆ្មាដែលហៅថា «ខ្លាតូច» លើតារាងមុខម្ហូបវៀតណាម ដែលមិនសូវពេញនិយមដូចសាច់ឆ្កែ តែក៏សម្បូរលក់ស្ទើរគ្រប់ទីកន្លែងដែរ។ យោងតាមសេចក្ដីថ្លែងការណ៍បានបង្ហាញថា ទម្លាប់សម្លាប់សត្វធ្វើម្ហូបនេះពិតជាសាហាវព្រៃផ្សៃណាស់ ហើយអាជ្ញាធរក្រុងហាណូយសង្ឃឹមថាប្រពៃណីដ៏យូរលង់នេះនឹងត្រូវបញ្ចប់។ គណៈកម្មការប្រជាមានិតក្រុងហាណូយបានបន្ដថាវាជាការថែរក្សាកេរ្ដិ៍ឈ្មោះក្រុងហាណូយជា «ទីក្រុងស៊ីវិល័យ និងទាន់សម័យ» ក្នុងក្រសែភ្នែកជនបរទេសដែលពួកគេជាច្រើនយល់ឃើញថា ការទទួលទានសាច់សត្វជាការបំពានដល់សត្វ។ សេចក្ដីថ្លែងការណ៍បន្ដថា៖ «ការជួញដូរ ការសម្លាប់ និងការប្រើសាច់ឆ្កែ និងឆ្មា បានបង្កជាប្រតិកម្មអវិជ្ជមានពីសំណាក់ភ្ញៀវទេសចរ និងជនបរទេសរស់នៅក្នុងក្រុងហាណូយ»។ ឆ្កែ និងឆ្មាជាង ៤៩៣០០០ ក្បាលក្នុងទីក្រុងដែលចំនួនដ៏ច្រើនលើសលប់ត្រូវបានបីបាច់ជាសត្វចិញ្ចឹម និងមានហាងប្រមាណ ១០០០ ទីតាំងបើកលក់សាច់សត្វនេះ។ មនុស្ស៣នាក់ បានស្លាប់ដោយសារជំងឺឆ្កែឆ្កួតក្នុងក្រុងហាណូយ តាំងពីដើមឆ្នាំហើយ២ នាក់ផ្សេងទៀត ត្រូវបានអះអាងថាឆ្លងជំងឺ។ នេះបើយោងតាមតួលេខផ្លូវការ។ ទីក្រុងធំរបស់វៀតណាមមួយនេះមានឈ្មោះល្បីល្បាញចំពោះម្ហូបចិញ្ចើមផ្លូវ ហើយតូបអាហារដូចជា ហាងគុយទាវហ្វឺ និងសាំងវិច ប៉ាតេ បាញ់មី ជាប់ក្នុងតារាងមុខម្ហូបនៅទូទាំងពិភពលោកចាប់ពីក្រុងប៉ារីសរហូតដល់ភីតប៊ើក។ ក្រុងហាណូយ ក៏ជាទីឋានសម្រាប់អ្នកផ្សងព្រេងស្វែងរកម្ហូបអាហារ និងសាច់ប្លែកៗ រួមមាន សាច់ពស់ សាច់កង្កែប ពងទាកូន ឬស៊ុបអណ្ដើកជាដើម៕ ប្រភពៈ thestar.media
ហាមដាច់ខាតការយកអត្ថបទ ពីវេបសាយ khmernews.news ដោយគ្មានការអនុញាត។