លោកគ្រូ អ្នកគ្រូ និងសិស្សានុសិស្ស លើកបដាតវ៉ា ក្រោយពីក្រសួងសម្រេច ដាក់សាលាទៅជា... - សង្គម សិល្បៈ កម្សាន្ដ - Khmer News - The latest Cambodia News. Khmer Times is the region's fastest growing newspaper with daily insights into Cambodia and ASEAN

លោកគ្រូ អ្នកគ្រូ និងសិស្សានុសិស្ស លើកបដាតវ៉ា ក្រោយពីក្រសួងសម្រេច ដាក់សាលាទៅជា...

ភ្នំពេញ៖ នៅថ្ងៃទី ១៩ ខែកញ្ញា ឆ្នាំ២០១៨នេះ សិស្សានុសិស្ស និងលោកគ្រូ អ្នកគ្រូ បន្តលើកបដាទាមទារមិនឲ្យដកលោកមូល ស៊ុយហេង នាយកវិទ្យាល័យព្រះស៊ីសុវត្ថិ ។

រឿងរ៉ាវដកលោកនាយក មូល ស៊ុយហេង ហើយដាក់សាលាមួយនេះទៅជាសាលាឯកជនវិញ ធ្វើឲ្យប្រជាពលរដ្ឋកើតទុក្ខមិនសុខចិត្ត ពីលោកគ្រូ-អ្នកគ្រូនៃវិទ្យាល័យព្រះស៊ីសុវត្ថិ និងសិស្សានុសិស្សដែលធ្លាប់រៀន និងរៀននៅវិទ្យាល័យព្រះស៊ីសុវត្ថិមួយនេះ។

ក្នុងនោះមានលោកគ្រូ -អ្នកគ្រូ១៤៧ អ្នកនៃវិទ្យាល័យដ៏ចាស់បុរាណមួយនេះ បានដិតមេដៃតវ៉ាប្រឆាំងដាច់ខាតនូវការដកលោកនាយកគ្រប់គ្រងសាលា ។

ជាងនេះទៅទៀតការដកនេះ គឺដាក់បញ្ចូលវិទ្យាល័យព្រះស៊ីសុវត្ថិទៅជាសាលាជំនាន់ថ្មីដែលហៅកាត់ NGS គឺប្រៀបដូចទៅនឹងសាលាឯកជនមួយ កើតឡើងលើវិទ្យាល័យមួយនេះផងដែរ ព្រោះការសិក្សាត្រូវមានការបង់លុយ ។

ការតវ៉ានេះហាក់បីដូចជាប្រឆាំងនឹងថ្នាក់លើរបស់ខ្លួន គឺលោករដ្ឋមន្ត្រីក្រសួងអប់រំ ខណៈដែលមន្ទីរអប់រំ យុវជន និងកីឡា រាជធានីភ្នំពេញ បានចេញសេចក្តីជូនដំណឹង ដោយប្រកាសអញ្ជើញគណៈនាយក លោកគ្រូ អ្នកគ្រូ ទាំងអស់នៃវិទ្យាល័យព្រះស៊ីសុវត្ថិ ចូលមប្រជុំស្តីពី ការប្រកាសសមាសភាពគណៈគ្រប់គ្រង បណ្តោះអាសន្ននៅវិទ្យាល័យ ព្រះស៊ីសុវត្ថិ នាថ្ងៃទី១៩ខែកញ្ញា ក្រោមអធិបតីភាពលោក បណ្ឌិតសភាចារ្យ ហង់ ជួន ណារ៉ុន រដ្ឋមន្ត្រីក្រសួងអប់រំយុវជននិងកីឡា។

ការដាក់បញ្ចូលវិទ្យាល័យព្រះស៊ីសុវត្ថិ ទៅជាសាលាជំនាន់ថ្មី ដែលហៅកាត់ NGS គឺសាលាព្រះស៊ីសុវត្ថិ មានពីរវេនគឺ សាលាជំនាន់ចាស់ និងសាលាជំនាន់ថ្មី ហើយការវាយជួងគឺវាយពីរដង ។ សាលាជំនាន់ចាស់ វាយជួងចូលរៀននៅម៉ោង៧ព្រឹក រីឯសាលាជំនាន់ថ្មី វាយជួងចូលរៀននៅម៉ោង៧និង៣០នាទី ហើយក្នុងបំពាក់ទៅដោយបរិក្ខារទំនើប និងមានបំពាក់ម៉ាស៊ីនត្រជាក់ ជាដើម។

មានការភ្ញាក់ផ្អើលមិនសុខចិត្ត ពីលោកគ្រូអ្នកគ្រូនៃវិទ្យាល័យព្រះស៊ីសុវត្ថិ ពេលឮដំណឹងថា ត្រូវដកលោកនាយកវិទ្យាល័យព្រះស៊ីសុវត្ថិ មូល ស៊ុយហេងដោយគ្មានមូលហេតុ។

សិស្សម្នាក់បាននិយាយថា សាលាវិទ្យាល័យព្រះស៊ីសុវត្ថិ ជាសាលាដែលសល់ពីជំនាន់ព្រះបាទ ស៊ីសុវត្ថិ មកម្ល៉េះ មិនត្រូវយកសាលានេះ ឲ្យទៅជាសាលាឯកជននោះ។

សិស្សនិស្សិតដែលធ្លាប់រៀននៅសាលាបន្តថា នៅតែបន្តការតវ៉ា បើសិនមិនមានការដោះស្រាយ រឿងដកលោកគ្រូនាយក នឹងផ្ទេរសាលានេះ ទៅជាសាលាឯកជន។

ប៉ុន្តែមហាជនបានលើកឡើងថា ការផ្លាស់ប្តូរនាយកសាលា គឺជាសិទ្ធិនិងតួនាទីរបស់ក្រសួងអប់រំ មិនមែនគ្រូ និងសិស្ស ជាអ្នកសម្រេចនោះទេ ហើយការតវ៉ានោះ នឹងនាំឲ្យមានបញ្ហាកាន់តែធំនិងធ្ងន់ធ្ងរ ចំពោះនាយកសាលាស៊ីសុវត្ថិ ។ ប្រភពដដែលបន្តថា ការតវ៉ានេះ អាចជាល្បិចរបស់លោកមូល ស៊ុយហេង ដើម្បីបានខ្លួននៅធ្វើជានាយកសាលានេះ បានទៅញុះញង់ឲ្យគ្រូ និងសិស្ស លើកបដាតវ៉ា ដើម្បីការពារតំណែងរបស់ខ្លួន។

លោក ហែម ស៊ីណារ៉េត ប្រធានមន្ទីរអប់រំ រាជធានី បានអញ្ជើញលោកគ្រូ អ្នកគ្រូ ចូលធ្វើការពិភាក្សានៅខាងក្នុងបន្ទប់វិញ។ ប៉ុន្តែទោះបីជាយ៉ាងណាក្តី ការចរចាគ្នាយ៉ាងណានោះ មិនទាន់ទំលាយឲ្យដឹងនូវឡើយទេ ។

បណ្តាញសង្គមហ្វេសប៊ុក គណនី Phosthey Kouy បានលើកឡើងថា យើងមិនចង់បាត់បង់វិទ្យាល័យព្រះស៊ីសុវត្ថិរបស់យើង។

សុខៗ មកឮថាចង់ផ្លាស់ប្តូរដាក់ជា NGS (សាលាជំនាន់ថ្មី) គិតថា NGS និងល្អប៉ុនណាទៅ អស្ចារ្យប៉ុនណាទៅ បានជាចង់មកលុបបំបាត់ វិទ្យាល័យរបស់ពួកយើង។ សុំលោករដ្ឋមន្ត្រីក្រសួងអប់រំ ដកសាលារៀនជំនាន់ថ្មីចេញទៅ។ លើសពីនេះទៅទៀត សូមលោកពិចារណាឡើងវិញ នូវការដែលលោកចង់ដកលោកនាយក មូល ស៊ុយហេង ចេញ។ ពួកយើងមិនឯកភាពដាច់ខាត។ ឱ! វិទ្យាល័យខ្ញុំអើយ តើអ្នកនឹងក្លាយទៅជាយ៉ាងណា? ។

ចំណែកគណនី Heng Seyha បានសរសេរថា ក្នុងនាមជាអតីតសិស្សវិទ្យាល័យព្រះស៊ីសុវត្ថិ ខ្ញុំមានកិត្តិយស ដោយបានប្រាប់សិស្សទាំងអស់ ឱ្យជួយប្រឆាំងនឹងជំនាន់ថ្មី Schoool (NGS) ដែលបានបង្កើតឡើងអស់រយៈពេល 3 ឆ្នាំរួចមកហើយ និងបានទទួលនូវលក្ខណៈសម្បត្តិ របស់សាលាបន្តិចម្តងៗ ។ យើងទាំងអស់គ្នា កំពុងប្រមូលសិស្សចាស់ និងបច្ចុប្បន្ន នៃសាលារៀនម៉ោង 6:30 ព្រឹកថ្ងៃស្អែក។

ក្រសួងអប់រំយុវជននិងកីឡា សម្រេចដកលោក មូល ស៊ុយហេង នាយកវិទ្យាល័យព្រះស៊ីសុវត្ថិ ដោយសារក្នុងសាលាវិទ្យាល័យព្រះស៊ីសុវត្ថិ មានការបង្រៀនស្ដង់ដារ២ គឺសាលាជំនាន់ចាស់ និងសាលាជំនាន់ថ្មី ក្នុងបរិវេណសាលាតែមួយ ដែលធ្វើឲ្យមានការរើសអើង និងមិនចុះសម្រុងគ្នាទៅវិញទៅមក រវាងសិស្សនិងសិស្ស ហើយគ្រូនិងគ្រូ។

គឺដាក់បញ្ចូលវិទ្យាល័យព្រះស៊ីសុវត្ថិទៅជា សាលាជំនាន់ថ្មី ដែលហៅកាត់ NGS គឺប្រៀបដូចទៅនឹងសាលាឯកជនមួយកើតឡើងលើវិទ្យាល័យមួយនេះផងដែរ ព្រោះការសិក្សាត្រូវមានការបង់លុយ ដើម្បីទ្រទ្រង់ដល់គម្រោងបង្កើតសាលាជំនាន់ថ្មីនេះបន្តទៅមុខទៀត។

ក្រសួងអប់រំ យុវជន និង កីឡា តាមរយៈអ្នកនាំពាក្យ លើកឡើងថា រហូតដល់ល្ងាច ថ្ងៃទី១៨ កញ្ញានេះ ក្រសួងមិនទាន់ទទួលបានញត្តិ តវ៉ាពីក្រុមគ្រូបង្រៀនទាំងនោះនៅឡើយទេ ហើយនៅព្រឹកថ្ងៃទី១៩ កញ្ញា ក្រសួងអប់រំ នឹងពិនិត្យដោះស្រាយលើការតវ៉ានេះ ។

ក្រុមគ្រូបង្រៀន នៅវិទ្យាល័យព្រះស៊ីសុវត្ថិ បានលើកឡើងថា សាលាជំនាន់ថ្មីបានធ្វើឲ្យសិស្ស និងសិស្ស គ្រូ និង គ្រូ និងគណៈគ្រប់គ្រង មានការរើសអើងគ្នា នឹងគ្នា ។ ក្រុមគ្រូបង្រៀន ក៏បានស្នើសូមសម្តេចតេជោ ហ៊ុន សែន ជួយកុំឲ្យមានការបង្កើតសាលាក្នុងសាលា ( សាលាជំនាន់ថ្មី ព្រោះសាលាជំនាន់ថ្មីបានធ្វើឲ្យបែកបាក់សាមគ្គីផ្ទៃក្នុង ) ។ ក្រុមគ្រូបង្រៀន អ្នកតវ៉ាក៏បានទាមទារឲ្យក្រសួងអប់រំ ត្រូវតែ ដកសាលាជំនាន់ថ្មី ចេញពីវិទ្យាល័យព្រះស៊ីសុវត្ថិ ជាដាច់ខាត ។

ជាមួយគ្នានោះ ក្រុមគ្រូបង្រៀន អ្នកតវ៉ាក៏នលើកឡើងថា “ ការបង្កើតសាលាជំនាន់ថ្មី នៅក្នុងវិទ្យាល័យព្រះស៊ីសុវត្ថិ ធ្វើឲ្យបាត់បង់ បេតិកភណ្ឌជាតិ ។ ក្នុងនោះការបង្កើត សាលាក្នុងសាលា គឺដូចបង្កើតរដ្ឋ ក្នុងរដ្ឋ ” ។

ក្រៅពីការតវ៉ាជំទាស់ នឹងការបង្កើតសាលាជំនាន់ថ្មី នៅក្នុងវិទ្យាល័យព្រះស៊ីសុវត្ថិ លោកគ្រូ អ្នកគ្រូ ក៏បានតវ៉ានឹងការប្រកាសតែងតាំង សមាសភាព គណៈគ្រប់គ្រងបណ្តោះអាសន្ន នៅវិទ្យាល័យព្រះស៊ីសុវត្ថិ ពោលគឺក្រុមគ្រូបង្រៀន ប្រឆាំងនឹងការដកលោក មួល ស៊ុយ ហេង ចេញពីនាយកវិទ្យាល័យព្រះស៊ីសុវត្ថិ ផងដែរ ។

ជុំវិញ ការតវ៉ារបស់គ្រូបង្រៀនជាច្រើននៅវិទ្យាល័យព្រះស៊ីសុវត្ថិ នា រសៀលថ្ងៃទី១៨ ខែកញ្ញា ឆ្នាំ២០១៨ ត្រូវបានលោក ឌី ខាំបូលី អ្នកនាំពាក្យក្រសួង អប់រំ យុវជន និង កីឡាបានឲ្យដឹងថា ក្រសួងមិនទាន់បានទទួលញត្តិតវ៉ាណាមួយនៅឡើយទេ គ្រាន់តែបានដឹងថា មានគ្រូបង្រៀនមួយចំនួន នៅវិទ្យាល័យព្រះស៊ីសុវត្ថិ បានលើកបដាតវ៉ា ៕