អភិបាលក្រុងព្រះសីហនុ លើកឡើងថា ជនជាតិចិន មកលេងខេត្តព្រះសីហនុ កាន់តែច្រើន គឺកាន់តែរីកចំរើន កាន់តែជោគជ័យ
ព្រះសីហនុៈ លោកអ៊ី សុខឡេង អភិបាលក្រុងព្រះសីហនុ បានលើកឡើងថា ចំនួនអ្នកវិនិយោគិន និងអ្នកទេសចរណ៍ចិនមកវិនិយោគ និងដើរលេខកម្សាន្តនៅខេត្ដព្រះសីហនុកាន់តែច្រើន គឺជាជោគជ័យមួយរបស់រាជរដ្ឋាភិបាលកម្ពុជា។
លោកអ៊ី សុខឡេង បានប្រាប់អ្នកសារព័ត៌មានថា "ខ្ញុំសូមជម្រាប ថា ក្រុងព្រះសីហនុក្នុងរយៈពេលមួយឆ្នាំចុងក្រោយនេះគឺថា ការរីកចំរើន លើគ្រប់វិស័យ ជាពិសេសវិស័យសំណង់ ក៏ដូចជាវិស័យទេសចរណ៍ មានការកើនឡើងបាទ! ឆ្លៀតក្នុងឱកាសនេះផងដែរ ខ្ញុំសូមជម្រាប ជូន បងប្អូនប្រជាពលរដ្ឋនៅក្រុងព្រះសីហនុ ក៏ដូចជាបងប្អូនប្រជាពលរដ្ឋទូទាំងប្រទេស ឲ្យបានជ្រាបថា ក្រុងព្រះសីហនុ រយៈពេលមួយឆ្នាំចុងក្រោយនេះ អ្នកទេសចរណ៍ ក៏ដូចជាអ្នកវិនិយោគទុនបរទេស បានមកទេសចរណ៍ ក៏ដូចជាវិនិយោគយ៉ាងគំហុក នៅខេត្ដព្រះសីហុនរបស់យើងនេះ ជាពិសេសគឺថាភ្ញៀវទេសចរណ៍ចិន និងអ្នកវិនិយោគចិន"។ លោកអ៊ី សុខឡេង បានបញ្ជាក់បន្ថែមថា "ខ្ញុំគិតថា ការមកយ៉ាងគំហុករបស់ភ្ញៀវទេសចរណ៍ចិន និងវិនិយោគទុនចិននេះ គឺជាជោគជ័យ មួយរបស់រាជរដ្ឋាភិបាល ដែលផែនការរបស់រាជរដ្ឋាភិបាល គឺថាធ្វើយ៉ាងម៉េចទាក់ទាញ អ្នកវិនិយោគទុនចិន ជាពិសេសភ្ញៀវ ទេសចរណ៍ ចិនឲ្យមកកម្សាន្ត មកវិនិយោគនៅប្រទេសកម្ពុជារបស់យើងឲ្យបានច្រើនកាលណា គឺល្អកាលហ្នឹង" ៕ ប្រភពៈ BBN
ហាមដាច់ខាតការយកអត្ថបទ ពីវេបសាយ khmernews.news ដោយគ្មានការអនុញាត។