ស្លត់ចិត្ត... ស្រ្តីចំណាស់ម្នាក់ កំពុងតែអង្គុយហាលត្រីងៀតសុខៗ ស្រាប់តែដើមដូងងាប់ពុកផុយ បាក់ពាក់កណ្តាល បណ្តាលឲ្យ...
ភ្នំពេញ ៖ កាលពីម៉ោង២និង១០នាទីរសៀល ថ្ងៃទី១៥ ខែកញ្ញា ឆ្នាំ២០១៨ មានហេតុការណ៍ដ៏ភ្ញាក់ផ្អើលមួយបានកើតឡើង ដោយសារតែមានដើមដូងងាប់មួយដើម នៅសុខៗស្រាប់តែបាក់ធ្លាក់មួយកំណាត់សង្គត់លើស្រ្តីម្នាក់បណ្តាលឲ្យរងរបួសយ៉ាងធ្ងន់ធ្ងរ ហេតុការណ៍នេះបានកើតឡើងនៅចំណុច ដីឡូតិ៍មួយកន្លែង ស្ថិតក្នុងភូមិ៣ សង្កាត់ច្រាំងចំរេះទី១ ខណ្ឌឬស្សីកែវ ។
ស្រ្តីរងគ្រោះមានឈ្មោះថា សុះ អីសះ អាយុ៥០ឆ្នាំ មុខរបរលក់ត្រីងៀត ជនជាតិខ្មែរអ៊ិស្លាម មានលំនៅផ្ទះលេខ៣២១ ក្បែរកន្លែងកើតហេតុ។ បើតាមសម្តីអ្នកភូមិផងរបងជាមួយគ្នាបានប្រាប់ថា នៅមុនពេលកើតហេតុ ស្ត្រីរងគ្រោះកំពុងតែហាលត្រីងៀតសុខៗ ស្រាប់តែដើមដូងងាប់មួយដើមដែលមានសភាពពុកបានបាក់ពាក់កណ្តាលដើមធ្លាក់ចុះមកសង្កត់ចំក្បាលស្ត្រីរងគ្រោះតែម្តង បណ្តាលរងរបួសធ្ងន់។ ភ្លាមនោះក្រុមគ្រួសារដឹកបញ្ជូនទៅកាន់មន្ទីរពេទ្យឯកជន ប៉ុន្តែដោយស្ថានភាពធ្ងន់ធ្ងរក្រុមគ្រួសារក៏បញ្ជូនទៅកាន់មន្ទីរពេទ្យកាល់ម៉ែតតែម្តង ដើម្បីសង្គ្រោះ៕ ដោយ៖ ភារ៉ា
ហាមដាច់ខាតការយកអត្ថបទ ពីវេបសាយ khmernews.news ដោយគ្មានការអនុញាត។